Bakıda keçirilən U-17 dünya çempionatında Azərbaycanın sərbəst güləşçilərinin daha çox medal qazanmasını arzuladığını bildirən millinin böyük məşqçisi Hacı Əliyev yarışın nəticələrini dəyərləndirib.

Prosport.Az xəbər verir ki, o, jurnalistlərə açıqlamasında məşqçi kimi ilk böyük turnirində daha yaxşı nəticə gözlədiyini deyib:

“İstərdim ki, 10 sərbəst güləşçimizin hər biri medal qazansın. Dünya çempionatına təxminən ayyarım qalmış komandaya qoşuldum. Güləşçi kimi nəticə qazanmaq başqa, məşqçi kimi uğur əldə etmək isə tam fərqlidir”.

Hacı Əliyev sərbəst güləşdə rəqabətin çox yüksək olduğunu vurğulayıb:

“Yunan-Roma və qadın güləşi ilə müqayisədə sərbəst növdə ABŞ, Yaponiya və İran idmançıları çox güclüdürlər. Buna görə rəqabət bizim üçün daha çətindir”.

Mütəxəssis gələcək yarışlarda daha uğurlu nəticələr əldə edəcəklərinə inandığını bildirib:

“Öz üzərimizdə daha çox çalışacağıq. İbrahim Həsənov kimi digər güləşçilərimiz də gələcəkdə uğurlu nəticələr qazanacaqlar”.

O, mundialın Bakıda keçirilməsinin idmançılar üzərində əlavə psixoloji təzyiq yaratdığını da qeyd edib:

“Düşünürdüm ki, azarkeşlərimizin dəstəyi onları ruhlandıracaq. Amma bu həvəs müəyyən qədər həyəcanla əvəz olundu”.

Qeyd edək ki, Azərbaycanın sərbəst güləş millisi U-17 dünya çempionatını 1 gümüş medalla başa vurub. Yeganə medalı İbrahim Həsənov (51 kq) qazanıb.