Bakıda keçirilən U-17 Avropa çempionatında 51 kq çəki dərəcəsində Azərbaycanın sərbəst güləşçisi İbrahim Həsənov final görüşündə 5:1 hesabı ilə məğlub olaraq gümül mesal qazanıb.

Prosport.Az xəbər verir ki, təmsilçimiz mükafatlandırılmadan sonra jurnalistlərin suallarını cavablandırıb.

– Əlhəmdülillah, medalsız qalmadım. Amma mən ora qızıl medal üçün getmişdim. İstəyirdim himnimiz səslənsin, bayrağımız dalğalansın. Təəssüf ki, bu, alınmadı.

– Finala qədər bütün rəqiblərinizi böyük üstünlüklə məğlub etmişdiniz. Finalda bunun davamını gətirməyə nə mane oldu? Həyəcan idi, yoxsa başqa səbəb?

– Həyəcan yox idi. Sadəcə, səhvlər etdim. Tələskənlik də oldu. Görüş zamanı bir neçə səhvim oldu və buna görə məğlub oldum.

– Sərbəst güləş yığmasında yeganə medal qazanan idmançı kimi özünüzü necə hiss edirsiniz?

– Açığı, bunu sözlə ifadə etmək çətindir. Hazırda necə hiss etdiyimi tam deyə bilmirəm.

– Digər doqquz güləşçinin medalsız qalması sizə necə təsir etdi?

– Mən istəyirdim qızıl medal qazanım, himnimizi səsləndirim və bütün komanda yoldaşlarımızın başını uca edim. Təəssüf ki, bunu bacarmadım.

– Sizcə, iranlı rəqibinizə qarşı nə çatmadı?

– Məndə hər şey var idi. Sadəcə, görüşdə səhvlər etdim və nəticə belə oldu.

– Hansı səhvləri nəzərdə tutursunuz?

– Dəqiq olaraq nə olduğunu deyə bilmirəm. Sadəcə, səhvlər oldu.

– Sizin və komanda yoldaşlarınızın çıxışına baxanda parterdə müəyyən çətinliklər hiss olunurdu. Bu nə ilə bağlı idi? Bu istiqamətdə məşqlər keçirdiniz?

– Bəli, həmin istiqamətdə məşqlər keçmişdik.