Avropa Cüdo Birliyi (EJU) və Azərbaycan Cüdo Federasiyasının (ACF) birgə təşkilatçılığı ilə Bakıda keçirilən Avropa Cüdo Ümidləri Turnirinin açılış mərasimi keçirilib.

Prosport.Az xəbər verir ki, ACF prezidentinin müşaviri Natiq Bağırov jurnalistlərin suallarını cavablandırıb.

– Turnirin gənc cüdoçular üçün əhəmiyyətini necə qiymətləndirirsiniz?
– Onu da qeyd etmək istərdim ki, keçən il bu yarışın qalibi olan cüdoçumuz artıq yeniyetmələr arasında Avropa birinciliyində gümüş medal qazanıb. Bu yarış idmançılar üçün böyük təcrübədir. Burada müxtəlif ölkələrdən gələn cüdo qəhrəmanları və ekspertlər idmançılarımıza yeni fəndlər öyrədir, tatami üzərində hərəkət etmələri ilə bağlı biliklərini bölüşürlər. Gənc idmançılar məşhur cüdoçularla görüşür, onlarla ünsiyyətdə olur və görürlər ki, gələcəkdə özləri də Avropa və dünya çempionu, olimpiya mükafatçısı ola bilərlər.

– Turnirdə iştirak edən xarici idmançıların səviyyəsi barədə nə düşünürsünüz?
– Bu yarışda 10 ölkədən 88 klubun təxminən 300 idmançısı iştirak edir. İnanıram ki, ildən-ilə müxtəlif ölkələrdən gələn iştirakçıların sayı daha da artacaq. Xarici idmançılar da kifayət qədər güclüdür. Tatami hər şeyi göstərəcək.

– Bu turnirdə çıxış edən gənclərdən nə vaxt Avropa çempionları görə bilərik?
– Bu, ilk növbədə idmançıların özündən və məşqçilərin işindən asılıdır. Bu il U-14 və U-16 yaş qruplarında yarış keçiririk. Bildiyiniz kimi, ilk rəsmi Avropa birinciliyi U-18, daha sonra isə U-21 yaş kateqoriyalarında təşkil olunur. Keçən il isə turniri U-13 və U-15 yaş qruplarında keçirmişdik. Həmin yarışın qaliblərindən biri olan Fərid Rzazadə artıq 1 il sonra Avropa birinciliyində gümüş medal qazandı. Buna görə də düşünürəm ki, 1-2 ildən sonra bu turnirin iştirakçılarından da müxtəlif uğurlu nəticələr görəcəyik.

Bahar RÜSTƏM