Avropa Cüdo Birliyi (EJU) və Azərbaycan Cüdo Federasiyasının birgə təşkilatçılığı ilə Bakıda keçirilən Avropa Cüdo Ümidləri Turnirinin açılış mərasimi keçirilib.

Prosport.Az xəbər verir ki, Avropa Cüdo Birliyinin İdman komissarı, olimpiya və dünya mükafatçısı, qitə çempionu Rüstəm Orucov jurnalistlərin suallarını cavablandırıb.

– Bakıda keçirilən Avropa Cüdo Ümidləri Turniri ilə bağlı fikirlərinizi bilmək maraqlı olardı...
– Hər kəsi salamlayıram. Bildiyiniz kimi, biz Avropa Cüdo Birliyi adından buradayıq. Gördüyüm təşkilatçılıq çox yüksək səviyyədədir. Mən çox yarışlarda olmuşam, amma belə yüksək səviyyəli təşkilatçılığa az rast gəlinir. Bu yarışın əsas məqsədi gənc idmançıların təcrübə qazanmasıdır. Eyni zamanda klub məşqçilərinə də imkan yaradırıq ki, yarış prosesində məşqçi kimi fəaliyyət göstərərək onlar da təcrübə toplasın.

– Azərbaycanlı cüdoçulardan hansı nəticəni gözləyirsiniz?
– (gülür) Əlbəttə ki, uşaqlarımızdan qızıl medal gözləyirəm. Genetik olaraq onlar xarici uşaqlardan daha güclü olur və qalib gəlir.

– Bu turnir medallardan əlavə gənc idmançılara nə qazandıracaq?
– Medaldan da önəmlisi təcrübədir. Bildiyiniz kimi, buraya 2 mütəxəssis gəlib – biri Yaponiyadan, digəri isə İtaliyadan. Onlardan biri üçqat dünya çempionu və Olimpiya Oyunlarının bürünc mükafatçısıdır, digəri də Olimpiadanın bürünc medalçısıdır. Onlar gənc idmançılar üçün master-klass keçəcək. Bu, uşaqların inkişafı üçün çox önəmlidir. Məncə, belə tədbirlər daha çox təşkil olunmalıdır.

Bahar RÜSTƏM