İyulun 18-19-da Gəncə İdman Sarayında “Olimpiya Ümidləri” beynəlxalq karate turniri təşkil olunub.

Prosport.Az xəbər verir ki, Azərbaycan Karate Federasiyası və Gənclər və İdman Nazirliyinin birgə təşkilatçılığı ilə keçirilən yarışda Azərbaycanla yanaşı, Türkiyə, Pakistan, Gürcüstan və Rumıniyadan olan komandalar iştirak ediblər. Turnirdə ümumilikdə 600 idmançı qüvvəsini sınayıb.

Yarışlara yerli və xarici mütəxəssislərdən ibarət 32 nəfərlik hakimlər briqadası nəzarət edib. Hakimlər heyətində 12 beynəlxalq dərəcəli hakim yer alıb.

Turnirin əsas məqsədi ölkədə karatenin inkişafına töhfə vermək, yeniyetmə və gənclərin vətənpərvərlik ruhunda tərbiyəsinə dəstək olmaq, perspektivli idmançıları üzə çıxarmaq və beynəlxalq idman əməkdaşlığını genişləndirməkdir.

Turnirin açılış mərasimində şəhid ailələrinin üzvləri, qazilər, Milli Məclisin deputatları, Gəncə Şəhər İcra Hakimiyyətinin rəhbərliyi və idman ictimaiyyətinin nümayəndələri iştirak ediblər.