Gənclər və İdman Nazirliyi ilə Azərbaycan Şahmat Federasiyasının birgə təşkilatçılığı əsasında idman jurnalistləri arasında şahmat turniri keçirilib. 

Prosport.Az xəbər verir ki, “Bakı 2026 – Dünyanın İdman Paytaxtı” layihəsi çərçivəsində və 22 iyul – Milli Mətbuat Günü münasibətilə təşkil olunan yarışda 14 media nümayəndəsi iştirak edib.

“AĞ AT” şahmat məktəbində baş tutan turnirdə hər birində 2 jurnalist olmaqla 7 komanda mübarizə aparıb. 7 turdan sonra Vüqar İmanovla Ayaz Qurbanovun çıxış etdiyi komanda 5 xal toplayaraq 1-ci yeri tutub. Qalib komandadan yarım xal geri qalan İlkin Vidadioğlu və İsrayıl Xeyrullayevin kollektivi yarışı 2-ci yerdə başa vurub. İman Məcidovla Seymur Baxşıyevin komandası media turnirində 3-cü yerdə qərarlaşıb.

Qeyd edək ki, Prosport.Az saytının baş redaktoru Səbuhi Musa bu yarışda Peşəkar Futbol Liqasının əməkdaşı Faiq Tahirovla bir komanda şəklində mübarizə aparıb.