İtaliyanın Pistoya şəhərində "Gimnastika hamı üçün" növü üzrə 5-ci European Gym for Life Challenge festivalı keçirilib.

Prosport.Az xəbər verir ki, 21 ölkədən 4000-ə yaxın gimnastın qatıldığı yarışda Azərbaycanı təmsil edən "Flame" komandası uğurlu çıxışı ilə seçilərək 74 kollektiv arasında qızıl medala layiq görülüb.

Komandamız kiçik komandalar kateqoriyasında təqdim etdiyi kompozisiya ilə həm tamaşaçıların, həm də münsiflər heyətinin rəğbətini qazanıb. Qaliblərin mükafatlandırma mərasimində Avropa Gimnastikasının prezidenti Fərid Qayıbov da iştirak edib.

Qeyd edək ki, iyulun 12-16-da Pistoyada "Gimnastika hamı üçün" növü üzrə EUROGYM 2026 festivalı da keçirilir. İki ildən bir təşkil olunan festival bu dəfə 25 ölkədən 5000-ə yaxın iştirakçını bir araya gətirib.

Kütləviliyi və rəngarəng proqramı ilə seçilən EUROGYM müxtəlif yaş qruplarından olan gimnastlara bacarıqlarını nümayiş etdirmək, təcrübə mübadiləsi aparmaq və beynəlxalq dostluq əlaqələrini möhkəmləndirmək imkanı yaradır. Festivalın əsas məqsədi sağlam həyat tərzini və "Gimnastika hamı üçün" fəlsəfəsini təşviq etməklə yanaşı, idman vasitəsilə müxtəlif ölkələrin nümayəndələrini bir araya gətirməkdir.