UEFA Konfrans Liqasının I təsnifat mərhələsinin ilk oyununda "Zirə" Gürcüstan təmsilçisi "Torpedo"nu 3:0 hesabı ilə məğlub edib.

Prosport.Az xəbər verir ki, oyundan sonra komandanın qapıçısı Aydın Bayramov jurnalistlərin suallarını cavablandırıb.

– Oyunla bağlı fikirləriniz?

– Oyuna yaxşı hazırlaşmışdıq. Vaxtımız çox az idi. Avroliqaya vəsiqə qazanmağımız gözlənilmədən baş verdi. "Turan Tovuz" iştirak etmədiyi üçün biz bu imkanı əldə etdik. Qısa müddətdə maksimum dərəcədə hazırlaşmağa çalışdıq və yaxşı oyun sərgilədik.

– Bu qələbəni gözləyirdiniz?

– Asan oyun olmur, xüsusilə də avrokuboklarda. Rəqib də güclü komandadır ki, bu mərhələyə qədər gəlib çıxıb. İlk hissədə həm külək, həm də oyunun təzyiqi işimizi çətinləşdirirdi. Buna baxmayaraq, ilk oyun üçün yaxşı nəticə əldə etdik.

– Kağız üzərində rəqib favorit hesab olunurdu. Üstəlik, onların çempionatı davam edir. Bu amil sizdə əlavə təzyiq yaradırdı?

– Bəli, onların çempionatı davam etdiyinə görə fiziki cəhətdən daha hazırlıqlı idilər. Amma biz öz gücümüzə inanırıq. Hər oyuna qələbə qazanmaq üçün çıxırıq. Bu qarşılaşmaya da məhz həmin məqsədlə hazırlaşmışdıq.

– Bu hesabdan sonra cütün taleyinin həll olunduğunu demək olar?

– Xeyr, hələ heç nə həll olunmayıb. Bizi Gürcüstanda çox çətin səfər oyunu gözləyir. Orada yaxşı azarkeş dəstəyi, yaxşı meydança və daha motivasiyalı rəqiblə qarşılaşacağıq. Onlar cavab matçına daha ciddi hazırlaşacaqlar və bizi çətin oyun gözləyir.

Bahar Rüstəm