Bu il daha bir beynəlxalq idman turniri Bakıda keçiriləcək.

Prosport.Az-ın xəbərinə görə, ABŞ-nin "Karate Kombat" (Karate Combat) turnirinin Bakıda keçirilməsi üçün razılıq əldə olunub.

Bu turnir sentyabrın 26-da Bakıda keçiriləcək. "Karate Kombat" təşkilatının hazırkı prezidenti isə milliyyətcə ərəb olan, kikboksinq üzrə ikiqat dünya çempionu, Braziliya ciu-citsusu və cüdoda qara kəmərə sahib olan Asim Zaididir.

Bakıdakı turnirdə isə karate üzrə olimpiya mükafatçısı, beşqat dünya, onbirqat Avropa çempionu Rafael Ağayev döyüşəcək. Onun rəqibinin isə dəfələrlə qarşılaşmış, Olimpiadanın finalında uduzduğu italiyalı Luici Buza olacağı gözlənilir. Buza olimpiya çempionu olmaqla yanaşı, 2 dəfə dünya və 5 dəfə Avropa çempionatının qızıl medalını da qazanıb. Bu döyüşlə Rafael Ağayevin idmançı karyerasına rəsmi formada son qoyması planlaşdırılır.

Xatırladaq ki, 2022-ci ildə Rafael Ağayev, həmçinin idman karatesi millimizin baş məşqçisi Şahin Atamov bu turnirin kəmərini qazanıb.

Səbuhi Musa