Portuqaliyanın Koimbra şəhərində keçirilən batut gimnastikası və tamblinq üzrə Dünya Kubokunun final həyəcanı başa çatıb.

Prosport.Az xəbər verir ki, finalda batut gimnastikası üzrə təmsilçimiz Maqsud Mahsudov 61.440 xal toplayaraq yarışı 7-ci pillədə tamamlayıb.

Kişilərin sinxron proqramında isə Maqsud Mahsudov və Hüseyn Abbasov bürünc medalın sahibi olub. 

Tamblinq üzrə mübarizədə isə Mixail Malkin 32.300 xalla bütün rəqiblərini geridə qoyaraq qızıl medala sahib çıxıb. Tofiq Əliyev 29.300 xalla 3-cü yeri tutaraq bürünc medal qazanıb. Gümüş medala isə Portuqaliya təmsilçisi Vasku Pezu layiq görülüb.

Eyni gündə keçirilən Koimbra CimFest beynəlxalq turnirində də Azərbaycan gimnastları uğurlu çıxışları ilə yadda qalıb. Batut gimnastikası üzrə fərdi proqramda Maqsud Mahsudov qızıl, Hüseyn Abbasov isə gümüş medal qazanıb.

Tamblinq üzrə komanda yarışlarında Aleksey Karataşov, Bilal Qurbanov və Hüseyn Əsədullayev qızıl medala layiq görülüb.

Fərdi proqramda Bilal Qurbanov qızıl, Aleksey Karataşov isə bürünc medal əldə edib. Bundan əlavə, Sənan Rzazadə qızıl, Əsnad Niftiyeva və Xədicə Məmmədzadə də gümüş medalla turniri başa vurub.

Həmçinin, tamblinq üzrə Azərbaycan millisinin üzvü Mixail Malkin Dünya Kuboku seriyasının qalibi olub. İdmançımız mövsüm ərzində keçirilən Dünya Kuboku yarışlarında nümayiş etdirdiyi yüksək və stabil nəticələr sayəsində bu uğura imza atıb.