Kişi basketbol millimiz bu gün Avropa çempionatının ilkin təsnifat mərhələsində qrup autsayderi İrlandiyanı Bakıda qəbul edəcək. A qrupunun son turu çərçivəsində keçiriləcək matç yığmamızın son görüşü olacaq. Komandamız qalib gəlsə, qrupu 2-ci sırada başa vura bilər.
Prosport.Az oyundan öncə millimizin baş məşqçisi Tahir Baxşıyevdən müsahibə götürüb.
– Lüksemburq səfərində qələbə qazanmağımızda əsas amil hansı oynadı?
– Sona kimi döyüşdük. Uşaqlar sistemdən çıxmadı. Elə oldu ki, biz öndə olsaq da, rəqib daha sonra bizi keçdi. Yenə də biz fürsəti əldən vermədik və qalib gəldik. İnşallah, İrlandiya ilə oyunda da eyni sistemlə oynasaq, qalib gələcəyik.
– Heyətdə Saadettin Donatın olmaması nə dərəcədə sizə çətinlik yaradır?
– O, "Sabah"la son çempionluq oyununda zədə alıb. Yalnız avqustda məşqlərə başlaya biləcək. Saadettinin olmaması bir az problem yaradır. Əsas "5" nömrəmizdir, səbətin altında bizə çox köməyi dəyirdi. Onun yerinə Amil Həmzəyevi oynadırıq. Lüksemburqla matçda Əkbər Məmmədov o mövqedə oynamamasına baxmayaraq, özünü "5" nömrə kimi göstərə bildi. İrlandiya millisi Lüksemburqla müqayisədə ucaboy komandadır. Bu dəfə çalışacağıq ki, əsas "5" nömrələrimizdən daha çox istifadə edək.
– Millimiz bu seçmə mərhələdə qələbələrini ancaq səfərdə qazanıb. Bakıda isə qələbəmiz yoxdur. Bu gün Bakıda İrlandiya üzərində qələbə ilə bu tendensiyaya son qoymaq mümkün olacaq?
– Bizim əsas çətinliyimiz odur ki, Bakıya həmişə uzun səfərdən qayıdıb, oyuna çıxırıq. Ona görə də Bakıda da sanki səfər matçında oynayırmış kimi oluruq. Təqvim elə olmadı ki, Bakıda oynayıb, daha sonra səfərə çıxaq. Səfər uçuşları adamı çox yorur. 2 təyyarə ilə səfərə çıxırsan, qayıdanda da eyni üsulla geri dönürsən. Yollar adamı çox yorur. Digər rəqiblərimizdə belə təqvim yox idi. Təsəvvür edin ki, Dublindən 5 saat İstanbula uçursan, orada gözləyirsən, daha sonra Bakıya uçursan. Bunlar hamısı çətinlik yaradır. İndi də Lüksemburq səfərindən qələbə ilə qayıtmışıq. Amma buna baxmayaraq, bu gün çox vacib oyundur. Uşaqların hamısı qalib gəlməyə fokuslanıb. İnşallah, əlimizdən gələn hər şeyi edəcəyik ki, qalib gələk.
– İrlandiya millisini Dublində 76:74 məğlub etmişdiniz. Son 2 matçda – Ermənistana və Şimali Makedoniyaya uduzdular. Rəqibdə hansı dəyişikliklər var?
– Heyətlərini bir az dəyişiblər, gəncləşdiriblər. Bu bir tərəfdən bizim üçün müsbət, digər tərəfdən mənfidir. Gənclər də özünü yığmada göstərməyə çalışacaq, istəklə oynayacaqlar. Onların heyətində 5-6 nəfər yenilənib.
– Amma yenə də amerikan əsilli oyunçuları var...
– ABŞ-də yaşayan irland əsilli insanlar çoxdur. Ona görə də orada doğulmuş irland əsilli qara dərili amerikanları heyətlərinə asanlıqla qata bilirlər.
– Rəqib baş məşqçi Maykl Bri Dublindəki oyunun "taym-aut"u zamanı ölkəmizə qarşı təhqiramiz fikir səsləndirmişdi. Düzdür, sonradan Azərbaycan Basketbol Federasiyası FIBA-ya bununla bağlı şikayət etmişdi. Hərçənd, FIBA-dan Brinin cəzalandırılması ilə bağlı hüquqi prosedura rast gəlmədik. İstənilən halda, həmkarınızın bu danışığı sizin oyunçularda rəqibə qarşı xüsusi qıcıq formalaşdırıbmı?
– Əlbəttə, belə şeylər xoşagəlməz haldır. Amma biz bir məşqçiyə fokuslanıb, onun bu sözlərinə görə oynamamalıyıq. Biz bayraq altında matçlara çıxırıq. Belə şeylər adamı qızışdırıb yaxşı nəticəyə də, pis nəticəyə də sürükləyə bilər. Ona görə də çalışırıq ki, oyunçularla belə şeylərdən danışmayaq. Ancaq onlara sırf oyunla bağlı göstərişlərimizi veririk.
Səbuhi Musa