"Heç vaxt özümə inanmamışam. Ətrafımdakı insanlar inanıblar, inandırıblar".

Prosport.Az xəbər verir ki, bu sözləri Bakıda keçirilən "UFC Fight Night 280" turnirində meksikalı Manuel Toresə nokautla qalib gələn azərbaycanlı MMA döyüşçüsü Rafael Fiziyev deyib.

O, daxilən böyük bir qorxaq olduğunu bildirib: "12 yaşımdan özümə inanmamışam. Həmin uşaǧa bugün olanları danışmaq istəyirəm. Toreslə döyüşdə sadəcə bəxtim gətirdi. Həmin təpiyi vuranda heç nə görmürdüm. Sol gözümə yaxşı zərbə endirmişdi. Mükəmməl zərbə ilə məni kor etdi. Küncdəkilərə heç nə görmədiyimi dedim, özlərini eşitməməzliyə vurdular. Raund başlayan kimi zərbə atdım. Tutar tutar, tutmaz vəssalam. Tores çox sərtdir və bir gözlə onunla döyüşmək çətin olacaqdı. Bəxtim gətirdi, zərbə tutdu".

Rafael Fiziyev bu ilin fevralında Avstraliyanın Sidney şəhərində keçirilən "UFC Fight Night 325" turnirində braziliyalı Maurisio Ruffiyə məğlub oldğu döyüşü də xatırlayıb: "Ruffinin əks-hücumlarına çox hörmət edirdim, gərək etməzdim. Aktiv və aqressiv döyüşməli idim. O məǧlubiyyətdən sonra atam mənə hərtərəfli dəstək oldu. Castin Qeyci isə böyük motivasiya verdi. Castin ilə məşq etmək istəyirəm. Ondan çox şey öyrənə biləcəyimi düşünürəm. Məşqçisi əsl peşəkardır".