Çinin Sindao şəhərində keçirilən cüdo üzrə Qran-Pri turnirinin ikinci yarış günü Azərbaycan millisi üçün uğurlu alınıb.

Prosport.Az xəbər verir ki, Zelim Tçkayev (81 kq) bütün rəqiblərinə qalib gələrək turnirin çempionu olub. O, finalda Avstriya təmsilçisi Bernard Faşinqi məğlub edərək karyerasında ilk dəfə Qran-Pri turnirinin qızıl medalını qazanıb.

Hidayət Heydərov (81 kq) isə yeni çəki dərəcəsində ilk medalını əldə edib. Olimpiya çempionu bürünc medal uğrunda görüşdə Rusiya təmsilçisi Eqor Suxoparovu üstələyərək üçüncü yeri tutub.

Qeyd edək ki, turnirin ilk yarış günündə Əhməd Yusifov (60 kq) bürünc medal qazanmışdı. Beləliklə, Azərbaycan millisi Sindao Qran-Prisinin ilk iki yarış gününü 1 qızıl və 2 bürünc medalla başa vurub. Yığma ümumi komanda hesabında yalnız Yaponiyadan geri qalaraq 2-ci pillədə qərarlaşıb.