Ötən mövsüm basketbol üzrə Azərbaycan Kubokunun qalibi olmuş "Gəncə" komandasında kütləvi ayrılma baş verib.

Prosport.Az-ın xəbərinə görə, komandanın 4 əcnəbi və 5 yerli oyunçusu, həmçinin baş məşqçisi ilə yollar ayrılıb. 

Bunlar amerikalı basketbolçular – Kolin Törner, Cared Smoll, Cordan Endryus və Calen Qadi, yerli oyunçular – Əkbər Məmmədov, Cəbrayıl Əkbərov, Vuqar Məmişov, İslam Rzayev və Amil Həmzəyevdir. Litvalı baş məşqçi Meylyunas Qediminas ilə də yollar ayrılıb.

Bu oyunçulardan Əkbər Məmmədov NTD-yə, "Gəncə"də kapitanlıq etmiş Amil Həmzəyev isə yeni yaradılmış, mühafizə şirkətinin sponsorluq etdiyi, baş məşqçisi türkiyəli Murat Dikmənin olduğu "Baku Gesko"ya keçib.

Azərbaycan Basketbol Federasiyasından maliyyələşən klubun fəaliyyətinin davam edib-etməyəcəyi bilinmir. Davam etsə belə, "Gəncə" oktyabrdan etibarən start götürən çempionatda iddialı komanda durumunda olmayacaq.

Qeyd edək ki, ötən mövsüm Azərbaycan Kubokunun qalibi olmuş "Gəncə" çempionatda qızıl medalları "Sabah"a uduzub.