“Nicat Abbasov güclü şahmatçıdır. Yarışda göstərdiyi oyun bu sözləri deməyə imkan verir".

Prosport.Az xəbər verir ki, bunu norveçli şahmatçı Maqnus Karlsen Bakıdakı Dünya Kubokunun yarımfinalında Azərbaycan təmsilçisi Nicat Abbasova rəqib olması barədə danışarkən deyib.

33 yaşlı qrossmeyster onları maraqlı mübarizənin gözlədiyini vurğulayıb. O, yarımfinaldakı oyunu barədə də danışıb: “Fərqli oyun oldu. Debütdən aşkar irəliləyiş görmədim. Sonra oyunun ortalarında kiçik üstünlük hiss olunurdu. Yekunda heç-heçəyə razılaşdıq. İlk görüşdə qalib gəlmişdim. Ümumi nəticə yarımfinalda iştirakımı dəqiqləşdirdi”.

Beşqat dünya çempionu növbəti dəfə Azərbaycan paytaxtında olmaqdan məmnun olduğunu söyləyib və Dünya Kubokunun yüksək təşkilatçılığını qeyd edib: “Yenidən Bakıda olmaq xoşdur. Təşkilatçılıq yaxşıdır. Buradan yaxşı təəssüratlarla ayrılacağam".

Qeyd edək ki, karyerasında ilk dəfə Dünya Kubokunun yarımfinalına yüksələn Nicat Abbasov Maqnus Karlsenlə ilk görüşünü avqustun 19-da keçirəcək.