"Hamımız "Turan Tovuz"un avrokuboklardan kənarlaşdırılmasına üzüldük. "Turan Tovuz"un neçə illərdir ki, çempionata dönməsi, avrokubokda çıxış etməsini istəyirdik. 32 illik həsrət vardı. Biz çempionatda rəqib olsaq da, "Turan Tovuz" adına çox sevinirdim ki, bu il avrokubokda çıxış edəcək".

Prosport.Az xəbər verir ki, bu sözləri "Zirə"nin baş məşqçisi Rəşad Sadıqov "Qarabağ"la yoxlama oyunundan sonra jurnalistlərə açıqlamasında deyib.

"Üzgünük, amma bu, 7 il qabaq qəbul olunan qərardır. Nə qədər etirazlar olsa da, bu yöndə mübarizə aparılsa da, qərar dəyişmədi. Biz də son ana qədər gözləyirdik.

Hətta belə bir məqam oldu, məşqçi heyəti və rəhbərlik müzakirə apardıq. Bizim avrokuboklardan imtina etmək versiyamız vardı.

Çünki qəti hazır deyildik, çempionatın sonunda rəhbərliklə görüşümüzdə belə qərar qəbul etdik ki, yeni heyət formalaşdıraq, 2-3 ilin planını tutaq. Elə də oldu, çoxsaylı futbolçular getdi. Qərar çıxandan sonra rəhbərliklə müzakirə oldu. Sadəcə maraqlandıq, avrokubokdan imtina etsəydik, bizi də cəza gözləyəcəkdi", – deyə baş məşqçi qeyd edib.

Rəşad Sadıqov yaxşı nəticə əldə etmək istədiklərini söyləyib: "Burada "Zirə"ni və başqa kimisə günahlandırmaq düzgün deyil. Bu məsələ əvvəldən bilinsəydi, "Araz-Naxçıvan", "Sumqayıt" da etiraz edə bilər. Onlar da bu məsələni erkən bilsə, çempionatın son turlarına daha motivasiyalı çıxardı. Onda onlara qarşı da haqsızlıq olub. Daha doğru təhlil olsa, bizim məsələyə heç bir aidiyyətimiz olmadığı aydınlaşar".

Qeyd edək ki, 32 il sonra avrokuboklara vəsiqə qazanan "Turan Tovuz" UEFA tərəfindən Konfrans Liqasına buraxılmayıb. Bölgə təmsilçisinin əvəsinə Rəşad Sadıqovun komandası Konfrans Liqasında iştirak edəcək.