"Qarabağ" mövsümlərarası hazırlıq çərçivəsində keçirdiyi ilk yoxlama oyununda "Zirə"ni 4:3 hesabı ilə məğlub edib.

Prosport.Az xəbər verir ki, oyundan sonra Ağdam klubunun Mərakeş əsilli fransalı transferi Jali Muaddib jurnalistlərin suallarını cavablandırıb.

– “Qarabağ”a transferiniz necə baş tutdu?
– Mən Kiprdə (Aradippu "Omoniya"sı) oynayırdım. “Qarabağ”dan təklif gəldi. Bu barədə ailəmlə danışdım və onlar da qərarımı dəstəklədi. Çünki “Qarabağ” son illərdə Avropa turnirlərində mütəmadi iştirak edən və uğurlar qazanan komandadır. Bu kluba gəldiyim üçün çox xoşbəxtəm.

– Başqa klublardan da təklifləriniz var idi?
– Bəli, başqa təkliflər də var idi.

– Artıq “Qarabağ”ın heyətində ilk matçınıza çıxmısınız. Adaptasiya prosesi necə gedir?
– Sözsüz ki, yeni komandaya gələndə müəyyən çətinliklər olur. Məşqlər keçdikcə və komanda ilə birlikdə çalışdıqca hər şeyə öyrəşirsən. Komanda yoldaşlarım mənə çox kömək etdi. Qısa müddətdə komandaya uyğunlaşdım və məndən nələrin tələb olunduğunu anladım.

– Azərbaycan Premyer Liqası haqqında məlumatınız var? Buradakı şəxsi hədəfləriniz nələrdir?
– Mən 2-ci Abdellah Zubir olmaq istəyirəm. “Qarabağ” ötən mövsüm də mənimlə maraqlanmışdı, amma həmin vaxt transfer baş tutmamışdı. Azərbaycan Premyer Liqasını izləyirəm və hesab edirəm ki, maraqlı çempionatdır. Xüsusilə ötən mövsüm çox maraqlı keçdi. “Sabah” və “Neftçi” kimi komandalar güclənib. Liqa barədə kifayət qədər məlumatım var.

– UEFA Avropa Liqasında rəqibiniz artıq bəllidir. Komandanı uzaq səfər gözləyir. Rəqib barədə nə bilirsiniz?
– Bilirik ki, rəqib I Liqa komandasıdır və İslandiya Kubokunu qazanıb. Avrokuboklarda yüngül rəqib olmur. Biz də əlimizdən gələni edəcəyik ki, növbəti mərhələyə vəsiqə qazanaq. Ancaq bu rəqib haqda çox məlumatım yoxdur.

– “Qarabağ”a keçmək qərarınıza ən çox nə təsir etdi?
– “Qarabağ” mənə təklif göndərdi və mən bir gün ərzində razılıq verdim. Çünki bu, çox yaxşı komandadır. Davamlı olaraq avrokuboklarda iştirak edir. Klubun strukturu bəllidir, baş məşqçi uzun illərdir burada çalışır və sabitlik var.

– Qurban Qurbanovla ilk söhbətinizdə sizdən əsas gözləntisinin nə olduğunu dedi?
– Uzun söhbət etməyə imkanımız olmadı. O məndən Kiprdə göstərdiyim performansı burada da davam etdirməyimi istəyir. Mən də inanıram ki, komandaya kömək edə biləcəyəm.