Bakıda start götürəcək güllə və stend atıcılığı üzrə dünya çempionatında Ermənistanın 6 idmançısının iştirakı sual altındadır.

Prosport.Az-ın xəbərinə görə, bu gün Bakı Kristal Zalında açılış mərasimi keçirilmiş yarış üçün Ermənistan millisinin nümayəndə heyətinin gələcəyi hələ də bilinmir.

Bu barədə saytımıza Azərbaycan Atıcılıq Federasiyasının mətbuat xidmətinin rəhbəri Afət Yaqubova məlumat verib:

"Dünya çempionatı üçün 101 ölkə qeydiyyatdan keçib. Bunlardan biri də Ermənistandır. Lakin onların nümayəndə heyəti Bakıya gəlməyib və gəlməyəcəkləri ilə bağlı da məlumat verməyiblər. Sadəcə, yüksək səviyyədə zəmanət istəyiblər. Biz tərəfdən də digər iştirakçılara verildiyi kimi, onlara da zəmanət məktubu təqdim olunub.

Məsələn, Filippin daxildə olan problemə görə gəlməyəcəklərini Beynəlxalq Atıcılıq İdmanı Federasiyasına məlumat verib (5 idmançı ilə qatılmalı idilər – red.). Ancaq Ermənistan tərəfindən belə bir məlumat gəlməyib. Ona görə də deyə bilmərik ki, Ermənistan rəsmi şəkildə yarışa gəlməkdən imtina edib. Bununla belə, burda dünya çempionatı boyu müxtəlif növlər üzrə yarış keçiriləcək. Onlar yarışa yarıda da gələ bilərlər. Burda qayda pozuntusu yoxdur".

Xatırladaq ki, hələ iyunun 14-də Ermənistanın atıcılıq üzrə baş məşqçisi Seyran Nikoqosyan zəmanət veriləcəyi halda, 15 nəfərlik heyətlə Bakıdakı dünya çempionatında iştirak edəcəklərini bildirib. Təxminən 1 ay sonra – 11 iyulda Azərbaycanın Gənclər və İdman Nazirliyi bu zəmanətin veriləcəyini açıqlayıb. Bunun ardınca Ermənistan Atıcılıq Federasiyasının baş katibi Arek Saribekyan dünya çempionatında iştirak etmək istədiklərini və komandanın hər hansısa maneə ilə üzləşməyəcəyinə ümid etdiyini bildirib.

Qeyd edək ki, sabahdan etibarən Bakı Atıcılıq Mərkəzində dünya çempionatında məşqlərə, avqustun 17-dən isə yarışa start veriləcək. Atıcılıq Federasiyasının vitse-prezidenti Zemfira Meftahətdinovanın sözlərinə görə, dünya çempionatında Azərbaycanın 33 idmançısı mübarizə aparacaq. Yarışın bağlanış mərasimi sentyabrın 1-də baş tutacaq.