Qadın voleybolçulardan ibarət Azərbaycan millisi Avropa çempionatına hazırlıqları başa vurub.

Prosport.Az xəbər verir ki, yığma təlim-məşq toplanışı keçdiyi Sloveniyada son olaraq Macarıstan yığması ilə bir neçə yoxlama oyunu keçirib.

Komandalar arasındakı matç fərqli formatda təşkil olunub və yığmalar 2 heyətə bölünərək yerdəyişmə əsasında eyni anda fərqli meydanlarda oynayıb. Bu qarşılaşmaların 1-də Azərbaycan 3:0 hesabı ilə qəbələ qazanıb, digərində isə uduzub – 2:3.

Macarıstanla 3-cü oyun isə yarış öncəsi son yoxlama matçı olub. Görüş Azərbaycan millisinin 3:1 hesablı qələbəsi ilə yekunlaşıb.

Yığma bu gün qrup oyunlarının keçiriləcəyi Almaniyanın Düsseldorf şəhərinə yola düşəcək.

Qeyd edək ki, Almaniya, Belçika, İtaliya və Estoniyanın birgə ev sahibliyi edəcəyi Avropa çempionatının final mərhələsi sentyabrın 3-də yekunlaşacaq. 24 komanda 4 qrupda mübarizə aparacaq. C qrupunda yarışacaq Azərbaycan millisinin rəqibləri ev sahibi Almaniya ilə yanaşı, Türkiyə, Çexiya, İsveç və Yunanıstan olacaq.