Azərbaycan parataekvondoçusu Sabir Zeynalov Niderlandın Rotterdam şəhərində keçirilən Avropa para çempionatında bürünc medal qazanıb.

Prosport.Az xəbər verir ki, 58 kq çəki dərəcəsində çıxış edən idmançı 3-cü yer uğrunda qarşılaşmada qalib gələrək fəxri kürsüyə qalxıb.

Həmçinin para-taekvondoçulardan Röyalə Fətəliyeva (52 kq), İmaməddin Xəlilov (70 kq), Əbülfəz Abuzərli (80 kq) və Orxan Cəfərov (+80 kq) K-44 kateqoriyasında qüvvəsini sınayır.

Qeyd edək ki, daha əvvəl Azərbaycan paracüdoçuları qitə birinciliyini 7 medalla başa vurub. Şəhanə Hacıyeva (48 kq) və Xanım Hüseynova (70 kq) Avropa çempionu olub, İlham Zəkiyev (+90 kq), Dürsədəf Kərimova (+70 kq) və Namiq Abbaslı (73 kq) gümüş, İsmayıl Muradov (60 kq) və Xatirə İsmiyeva (+70 kq) isə bürünc medal qazanıb. Azərbaycan 8 medalla 5-ci sırada qərarlaşıb. Meydan sahibi Niderland, Ukrayna və Fransa ilk 3 sıranı bölüşdürür.

Qeyd edək ki, Avropa para çempionatı ilk dəfə təşkil olunur. Burada 10 idman növü – kamandan oxatma, badminton, boççia, qolbol, cüdo, atıcılıq, taekvondo, velosiped idmanı, əlil arabası basketbolu və əlil arabası tennisi üzrə yarışlar keçirilir. Azərbaycan yalnız son 3 yarışda təmsil olunmur. 8 avqustda başlamış yarış 20 avqustda başa çatacaq.