Rəsmən bu gün başa çatan Çinin Çendu şəhərində keçirilmiş XXXl Ümumdünya Yay Universitet Oyunlarında (Universiada) Azərbaycanın medal sıralamasındakı yeri bəlli olub.
Prosport.Az-ın xəbərinə görə, tələbə idmançılarımız yarışı 38-ci pillədə başa vurub.
Komandamız 3 gümüş və 6 bürünc medal qazansa da, qızıl mükafata həsrət qalıb. Belə ki, bədii gimnastımız Zöhrə Ağamirova 2 gümüş və 1 bürünc medal, cüdoçularımız Rəşid Məmmədəliyev (73 kq) gümüş, Leyla Əliyeva (48 kq), Yaşar Nəcəfov (66 kq), oğlanlardan ibarət cüdo millimiz bürünc medal əldə edib. Həmçinin, taekvondoda Minayə Əkbərova (46 kq), avarçəkmədə Bəhmən Nəsiri fəxri kürsünün 3-cü pilləsinə qalxıb.
XXXl Ümumdünya Yay Universiadasında ümumilikdə 53 ölkə idmançıları medal qazanıb. İlk 3 pillədə Çin (103 qızıl, 40 gümüş, 35 bürünc), Yaponiya (21 qızıl, 29 gümüş, 43 bürünc) və Cənubi Koreya (17 qızıl, 18 gümüş, 23 bürünc) qərarlaşıb.
Bəs tələbə idmançılarımızın bu nəticəsi necədir? Bunu əvvəlki illərlə müqayisə edək. Əvvəla, onu bildirək ki, Azərbaycanın tələbə idmançılarının ilk iştirak etdiyi yarış Yaponiyanın Fukuoka şəhərində 1995-ci ildə keçirilmiş XVIII Ümumdünya Yay Universiadasıdır. Lakin həmin yarışda medal qazana bilməmişik. Biz 2001-ci ildən etibarən qatılıb medal qazandığımız yarışlara nəzər salaq. Çox maraqlıdır ki, Universiadalar tarixində Azərbaycanın ilk medalı da Çində qeydə alınıb. Bu, 81 kq çəki dərəcəsində gümüş medal qazanmış cüdoçu Mehman Əzizov olub (hazırda cüdo millisində məşqçi işləyir – red.).
2001 Pekin (Çin) – 1 gümüş medal 38-ci yer
2003 Tequ (Cənubi Koreya) – 0 medal
2005 İzmir (Türkiyə) – 2 bürünc medal 55-ci yer
2007 Banqkok (Tailand) – 1 qızıl medal 45-ci yer
2009 Belqrad (Serbiya) – 2 qızıl medal 28-ci yer (18 idmançı ilə qatılmışıq)
2011 Sençen (Çin) – 2 gümüş medal 45-ci yer
2013 Kazan (Rusiya) – 3 qızıl, 4 gümüş, 7 bürünc medal 21-ci yer (81 idmançı ilə qatılmışıq)
2015 Kancu (Cənubi Koreya) – 2 qızıl, 1 bürünc medal 27-ci yer (8 idmançı ilə qatılmışıq)
2017 Taypey (Tayvan) – 3 qızıl, 1 gümüş, 4 bürünc medal 24-cü yer (19 idmançı ilə qatılmışıq)
2019 Neapol (İtaliya) – 2 qızıl, 3 gümüş 2 bürünc medal 18-ci yer (22 idmançı ilə qatılmışıq)
2021 Çendu (Çin) – 3 gümüş, 6 bürünc medal 38-ci yer (88 idmançı ilə qatılmışıq)
Göründüyü kimi, son 4 yarışda qızıl medal qazanılsa da, bu dəfə "tələbələr"imiz ali mükafata yaxın dura bilməyib. Ən maraqlısı isə odur ki, ilk dəfə bu qədər sayda (88) heyətlə yarışa qatılsaq da, 1 qızıl medal qazanmaq idmançılarımıza qismət olmayıb. Görünən odur ki, "tələbələr"imiz bu dərsdən "2" aldılar. Növbəti – 32-ci analoji yarış 2025-ci ildə Almaniyanın Reyn-Rur regionunda keçiriləcək. Bunadək isə buraxılan səhvləri bir daha təhlil etmək üçün kifayət qədər vaxtımız var.
Qeyd edək ki, Çendu Universiadasında su idman növləri (suya tullanma, üzgüçülük, su polosu), kamandan oxatma, atletika, badminton, basketbol, qılıncoynatma, gimnastika (idman gimnastikası, bədii gimnastika), cüdo, avarçəkmə, atıcılıq, stolüstü tennis, taekvondo, tennis, voleybol və uşu üzrə mübarizə gedib. 120 ölkənin təmsilçiləri bu yarışda iştirak edib.
Kanada səfər xərcləri və sağlamlıq risklərinə, Meksika maliyyə səbəblərinə görə yarışdan imtina edib. Böyük Britaniya da 16 martda tələbələrinin Çinə getməyəcəyini bildirib. Belarus və Rusiya Ukrayna münaqişəsinə görə yarışa buraxılmayıb. Hindistanın uşu komandası isə 3 idmançısına mübahisəli Tibet məsələsinə görə viza verilmədiyi üçün yarışı boykot edib.
Səbuhi Musa