Cüdo üzrə Olimpiya mükafatçımız Rüstəm Orucov karyerasını bitirdiyini açıqlayıb.

Prosport.Az xəbər verir ki, son vaxtlar zəif çıxışı ilə əlaqədar əsas heyətdən kənarda qalmış 31 yaşlı idmançı bu barədə qərarını sosial şəbəkə vasitəsilə bildirib:

"Unudulmaz illər idi və mən CÜDOnu seçdiyim, böyük arenalarda bayrağımızı dalğalandırmaq şərəfinə nail olduğum üçün çox xoşbəxtəm!

Ancaq hər səyahətin bir sonu da olur.

Avqustun 8-i Olimpiya medalı qazandığım gündür və məhz bu gün böyük idmanla vidalaşıram.

Bu illər ərzində mənə dəstək olan hamıya ürəkdən təşəkkürümü bildirirəm!

Nə yaxşı ki, varsınız!

İndi isə həyatımda yeni səhifə açmaq vaxtıdır".

Qeyd edək ki, Rusiya doğumlu Rüstəm Orucov 2016-cı ildə Braziliyanın Rio-de-Janeyro şəhərində keçirilmiş Yay Olimpiya Oyunlarının gümüş medalçısıdır. 73 kq-da çıxış etmiş Orucov 2 dəfə dünya çempionatının finalçısı, 5 dəfə Avropa çempionatının mükafatçısı olub. 2016-cı ildə Rusiyanın Kazan şəhərində Avropa çempionu olub. Bundan başqa, 1 dəfə "Masters", 3 dəfə "Böyük Dəbilqə" və 6 dəfə Qran Pri turnirlərinin qalibi kimi qızıl medal qazanıb. 1 dəfə Avropa Oyunları və 2 dəfə İslam Həmrəylik Oyunlarının da medallarını boynundan asıb.