"İmişli" sabiq baş məşqçisini geri qaytarır.

Prosport.Az-ın xəbərinə görə, 2024/25 mövsümünün sonunda komandanı Premyer Liqaya çıxarmış Fərid Namazov yenidən klubda çalışacaq.

Hazırda 21 yaşadək millimizdə (U-21) Rəşad Eyyubovun köməkçisi işləyən Fərid Namazov "İmişli"nin yeni əcnəbi məşqçilər korpusunda yer alacaq. O, əcnəbi baş məşqçinin köməkçisi kimi fəaliyyət göstərəcək. Bundan sonra onun U-21 millimizdə qalıb-qalmayacağı da müəyyənləşəcək.

Hazırda "Qarabağ"ın U-17 komandasını çalışdıran Vüqar Əsgərli də "İmişli"yə dəvət olunub. Ona "İmişli"nin yeni yaradılan U-19 komandasında baş məşqçi işləmək təklifi edilib. Hazırda tərəflər arasında danışıqlar davam edir.

Qeyd edək ki, daha öncə "İmişli"yə ispaniyalı və ya xorvatiyalı baş məşqçi təyin oluna biləcəyi xəbərini ictimaiyyətə çatdırmışıq.