Azərbaycan karate millisinin üzvü Mədinə Sadıqova Almaniyanın Frankfurt şəhərində keçirilən Avropa çempionatında qızıl medal qazanıb.
55 kq çəki dərəcəsində mübarizə aparan Mədinə finalda türkiyəli rəqibini məğlub edərək Avropa çempionatlarında qızıl medal qazanan ilk azərbaycanlı (legioner olmayan) qadın karateçi kimi tarixə düşüb.
Mükafatlandırılmadan sonra Mədinə Sadıqova ProSport.Az-ın Almaniyaya ezam olunmuş əməkdaşına müsahibə verib.
– Döyüşlə bağlı təəssüratların necədir? Özünüzdən qızıl medal gözləyirdinizmi?
– Açığı, bura çox çətinliklərlə gəlib çıxmışam. Qrupum da çox çətin idi. Son dünya çempionatının finalçıları və Premyer Liqaların çempionları ilə qarşılaşdım. Bir az tərəddüdüm var idi ki, finala çıxacağam, ya çıxa bilməyəcəyəm. Amma müəllimlərimin dəstəyi ilə bunu bacardım.
Başda öz müəllimlərim Seymur və Şahin Xudaverdiyevlər olmaqla, mənə dəstək olan hər kəsə təşəkkür edirəm. Hamı mənə inanırdı, dəstək olurdu ki, sən tarix yazmağı bacaracaqsan. Qeyd edim ki, mən son dünya çempionatında 4 döyüş qalib gəldim. Sadəcə finala 2 addım qalmış məğlub oldum. Bu mənə görə çox böyük məğlubiyyət idi. Bunun acısını ancaq Avropa çempionatının qızıl medalı ilə çıxara bilərdim...
Özüm də inana bilmirəm. Neçə ildən sonra Avropa çempionuyam. Tarix yazdım. Başda öz müəllimim Seymur Xudaverdiyev olmaqla, yığma komandanın baş məşqçisi Şahin Atamov, Rəhman Hətəmov və Azərbaycan Karate Federasiyasına təşəkkür edirəm. Bu təkcə mənim uğurum deyil, bütün Azərbaycanın uğurudur.
Mən həmçinin bütün qızlarımızdan, qadınlarımızdan qızıl medal gözləyirəm, hətta istəyirəm. Yarımfinala çıxanda komandam üçün əlimdən gələni etdim. Təəssüflər olsun ki, yarımfinalda fransızlara məğlub olduq. Sabah Ukrayna millisi ilə bürünc medal uğrunda mübarizə aparacağıq. İzləyənlər bilir ki, bizi fransızlara qarşı inanılmaz dərəcədə sıxdılar. Amma bu, bəhanə deyil. İnşallah ki, qadınlardan ibarət milli komandamız olaraq bürünc medalı qazanacağıq. Daha bir tarix yazacağıq. Hər kəsə təşəkkür edirəm, sizi öpürəm.
– Medalı kimə həsr edirsiniz? Siz həm də şəhid qızısınız...
– Məni yenə ağlatmağı bacardınız (ağlayır)... Mən həmişə böyüklərin yarışlarında 2-3-cü yer tutmuşam. Heç vaxt 1-ciliyim olmayıb. Həmişə istəmişəm ki, qızıl medalım olsun və bu medalı atama həsr edim. Mən bir şəhid qızıyam və medalımı atama həsr edirəm.
Demək istəyirəm ki, ata, qızın sənin yolunla gedir. Sənin adını Avropa arenalarına daşıyır. Sənin uğruna can verdiyin bayrağı Avropada qaldırır, himnini səsləndirir.
Səbuhi Musa
Frankfurt
