Əvəzedicilər Liqasının XXVI turunda "Qarabağ-2" öz meydanında "Kəpəz-2" üzərində 4:2 hesablı qələbə qazanıb.

Oyundan sonra “Kəpəz-2”nin futbolçusu Raul İsaqov matçla bağlı fikirlərini Prosport.Az-la bölüşüb.

— Oyun haqqında nə deyə bilərsiniz?
— Yaxşı oyun keçdi. Təəssüf ki, məğlub olduq. Hesabda 4:0 geri düşməyimizə baxmayaraq, özümüzə inanırdıq ki, geri dönüş edə bilərik. Amma alınmadı.

— 4:2-dən sonra da qol epizodlarınız oldu. Sizcə, əsas problem nə idi?
— Həmin epizodlarda təcrübə çatmadı. İnşallah, gələcək oyunlarda bu çatışmazlığı aradan qaldıracağıq.

— Həm Gənclər Liqasında, həm Əvəzedicilər Liqasında, həm də milli komandanın toplanışlarında iştirak edirsiniz. Bu sıx qrafik sizə nə dərəcədə çətinlik yaradır?
— Yorğunluq olur. Ardıcıl oyunlara çıxırıq. Amma bacardığımız qədər komandaya kömək etməyə çalışırıq.

— Yeni baş məşqçiyə uyğunlaşa bilmisiniz?
— Hazırda həm taktiki, həm də fiziki hazırlıq üzərində işləyirik. Məşqləri mənimsəməyə çalışırıq. Baş məşqçi dominant futbol oynamağı tələb edir.

Bahar Rüstəm