Əvəzedicilər Liqasının XXVI turunda "Qarabağ-2" öz meydanında "Kəpəz-2" üzərində 4:2 hesablı qələbə qazanıb.

Prosport.Az xəbər verir ki, oyundan sonra “Kəpəz-2”nin futbolçusu Şahnur İsmayılov matçla bağlı fikirlərini Prosport.Az-la bölüşüb.

— Oyun haqqında nə deyə bilərsiniz?
— “Qarabağ”ı təbrik edirəm. Komandamız məğlub oldu. Amma komanda yoldaşlarıma təşəkkür edirəm. Sona qədər mübarizə apardıq. Təəssüf ki, məğlub olduq.

— Hesab 4:2 olduqdan sonra da qol epizodlarınız vardı. Amma onları dəyərləndirə bilmədiniz. Sizcə, səbəb nə idi?
— Şanssızlıq oldu. Rəqib qapıçı da yaxşı seyvlərlə yadda qaldı. İnşallah, növbəti oyunlarda epizodları daha yaxşı dəyərləndirərik.

— Komandanızın hər 2 qolunun müəllifi siz oldunuz. Öz performansınızdan razı qaldınız?
— Komanda məğlub olduqdan sonra fərdi performans 2-ci plana keçir. Ona görə daha çox çalışmalıyıq, mən də daha çox işləməliyəm. Növbəti oyunlarda daha çox qol vuraraq komandama qələbə qazandırmağa çalışacağam.

— Həm Əvəzedicilər Liqasında, həm Gənclər Liqasında çıxış edirsiniz, eyni zamanda milli komandanın toplanışlarında iştirak edirsiniz. Bu sıx qrafik sizə psixoloji və fiziki baxımdan necə təsir edir?
— Məşqçilərimiz istəyir ki, daha çox oyun keçirək və inkişaf edək. Biz də əlimizdən gələni edirik ki, komandamız yaxşı oyun göstərsin.

— U-20 dünya çempionatına hazırlıqlar necə gedir?
— Hazırlıqlar çox yaxşı gedir. Əsas komandada da debüt etdim. Azər müəllimə təşəkkür edirəm ki, mənə şans verdi. Biz də çalışırıq ki, bu etimadı doğruldaq.

Bahar Rüstəm