Əvəzedicilər Liqasının XXVI turunda "Qarabağ-2" öz meydanında "Kəpəz-2" üzərində 4:2 hesablı qələbə qazanıb.

Oyundan sonra “Kəpəz-2”nin baş məşqçisi Xaliq Mərdanov matçla bağlı fikirlərini Prosport.Az-la bölüşüb.

— Oyun haqqında fikirlərinizi bölüşərdiniz...
— Oyun çox maraqlı keçdi. İlk hissə ilə bağlı onu deyə bilərəm ki, gec ayıldıq. Təxminən 1 saat əvvəl gəlmişdik. Uşaqlar oyuna tam köklənənə qədər rəqib artıq 3 qol vurmuşdu. Yol yorğunluğu və oyuna gec adaptasiya olunmağımız öz təsirini göstərdi. Hava da isti idi. Buna baxmayaraq, 2-ci hissədə toparlana bildik. Düşünürəm ki, 2-ci hissədə daha yaxşı oynayan tərəf biz idik. Çoxlu qol epizodlarımız oldu, amma onları dəyərləndirə bilmədik. Buna baxmayaraq komandama təşəkkür edirəm. Rəqibi də təbrik edirəm.

— Hesab 4:2 olduqdan sonra da qol imkanlarınız yarandı. Sizcə, əsas problem nə idi?
— Komandamız əsasən 2008 və 2009-cu il təvəllüdlü gənc futbolçulardan ibarətdir. Təcrübə çatışmazlığı hiss olundu. Bir qədər təcrübəli olsaydıq, hesabda önə də keçə bilərdik.

— Mövsümü komanda üçün necə dəyərləndirirsiniz?
— Bizim üçün çox çətin mövsüm oldu. Çünki həm Gənclər, həm də Əvəzedicilər Liqasında paralel çıxış edirik. 2 cəbhədə mübarizə aparmaq futbolçular üçün ciddi yük yaradır. Heyətimiz də geniş deyil, üstəlik zədələr çox olur. Demək olar ki, bir gündən bir oyuna çıxırıq. Çətin olmasına baxmayaraq, maraqlı mövsüm keçdi. Komandamı mübarizəyə görə təbrik edirəm. Mövsümü ayın 25-də başa vuracağıq.

— 2 liqada çıxış etməklə yanaşı, futbolçuların milli komandaya çağırılması da davam edirdi. Bu amil komandaya necə təsir göstərirdi?
— Təbii ki, bu da çətinlik yaradırdı. Milli komandanın toplanışlarına görə yoldaşlıq oyunları keçirmək imkanımız olmurdu. Amma uşaqlar sıx qrafikə baxmayaraq yaxşı mübarizə apardılar.

Bahar Rüstəm