AFFA U-14 Liqasının finalında “Qarabağ” penaltilər seriyasında “Sabah”a məğlub olub. Əsas vaxtı 1:1 hesabı ilə başa çatan qarşılaşmada “Sabah” penaltilərdə 4:2 hesablı qələbə qazanaraq çempion olub.

Oyundan sonra “Qarabağ”ın baş məşqçisi Asif Əlizadə Prosport.Az-a müsahibə verib.

– Oyunla bağlı fikirləriniz necədir?
– “Sabah” futbol komandasını təbrik edirəm. Yaxşı oyun oldu. Uşaqlara təşəkkür edirəm, sona qədər mübarizə apardılar. Penaltilər bir növ lotereyadır, qismət məsələsidir. Buna baxmayaraq, komandam yaxşı mübarizə apardı. Final da maraqlı keçdi. Bu cür oyunlar uşaqlar üçün böyük təcrübədir. Artıq növbəti çempionata hazırlaşacağıq.

– Mövsüm komanda üçün necə keçdi?
– Yaxşı keçdi. Komanda bu mövsüm ilk dəfə 11x11 formatında oyunlar keçirdi. Həm fərdi, həm də taktiki-texniki baxımdan uşaqlarda inkişaf hiss olunur. Təbii ki, bununla kifayətlənmirik. İyun ayında İtaliyaya səfər edəcəyik. Ayın 25-dən 8-dək turnirdə iştirak edib daha çox təcrübə qazanmağa çalışacağıq.

– Komanda gələn mövsüm U-15 Liqasında çıxış edəcək. Futbolçular fiziki və psixoloji baxımdan buna hazırdır?
– Uşaqdırlar belə məğlubiyyətləri tez unudur. Amma bu, fərddən asılıdır. Eləsi var, tez unudur, eləsi də var ki, uzun müddət təsirində qalır. Biz də uşaqlarla bu barədə daim danışırıq. Bu cür oyunlar və məğlubiyyətlər onların inkişafı üçün təcrübədir. Keçən il də finalda penaltilərdə “Neftçi”yə uduzmuşduq. Zaman keçdikcə bunu da unudacaqlar.

Bahar Rüstəm