Azərbaycan Respublikasının Əməkdar Məşqçisi Mirəli Seyidovun xatirəsinə həsr olunmuş kyokuşin üzrə karate turnirinin açılış mərasimindən sonra Azərbaycan Karate Federasiyasının baş katibi Qabil Sayadov Prosport.Az-a müsahibə verib.

– Yarış haqqında fikirləriniz necədir?

– Yarış Azərbaycan Karate Federasiyasının tərkibində fəaliyyət göstərən “Kyokuşin Senşi Karate” və onun tərkibində olan kyokuşin təşkilatlarının birgə təşkil etdiyi, əməkdar məşqçi Mirəli Seyidovun xatirəsinə həsr olunmuş turnirdir. Burada, həmçinin digər karate növləri də fəaliyyət göstərir. Biz Azərbaycan Kyokşin Birliyini yaratmışıq və bu yarışı da birlik olaraq təşkil etmişik.

– Qarşıdan Avropa çempionatı gəlir. Gözləntiləriniz nələrdir?

– 13-14 iyun tarixlərində Polşada yeniyetmələr, gənclər və böyüklər arasında Avropa çempionatı keçiriləcək. Komandamız da həmin yarışda iştirak edəcək. Gözləntilərimiz əvvəlki illərlə müqayisədə daha yüksəkdir. İnanırıq ki, komandamız qızıl, gümüş və bürünc medallar qazanacaq.

– Medal qazanan idmançılar üçün mükafat nəzərdə tutulubmu?

– Biz idmançıları hər zaman ilin sonunda mükafatlandırırıq. Hazırda konkret nə olacağını deyə bilmərəm. Dövlət tərəfindən də mükafat veriləcək. İdmançılara həm pul mükafatı, həm də dəyərli hədiyyələr təqdim olunur.

Bahar Rüstəm