AFFA U-13 Liqasının finalında “Qarabağ” “Neftçi”yə 5:6 hesabı ilə məğlub olub. 

Oyundan sonra Ağdam klubunun baş məşqçisi Ülvi Tarverdiyev Prosport.Az-a müsahibə verib.

– Oyunla bağlı fikirləriniz necədir?
– Yaxşı oyun oldu. Hər iki komanda yaxşı mübarizə apardı. Biz də yaxşı oyun sərgilədik. Qismət belə gətirdi, “Neftçi” çempion oldu. Amma finala yüksəlmək də müəyyən mənada çempionluq kimidir. Mən uşaqlardan razıyam. Həqiqətən də yaxşı futbol oynadılar və bu, məni sevindirir.

– Mövsümü ümumi olaraq necə dəyərləndirirsiniz? Komanda üçün uğurlu alındı?
– Mövsüm bizim üçün çox yaxşı keçdi. İnanıram ki, kənardan izləyən azarkeşlər də komandamızın liqa başlayandan finala qədər necə futbol oynadığını gördülər. Uşaqların meydanda yaxşı oyun göstərməsi mənim üçün çempionluqdan da önəmlidir. Finalda da onların oyunundan razı qaldım.

– Komanda gələn mövsüm U-14 Liqasında çıxış edəcək. Futbolçular fiziki və psixoloji baxımdan növbəti mərhələyə hazırdırlar?
– Onları hazırlamaq bizim üzərimizə düşür. Mənfi və müsbət cəhətlərini analiz edib inkişaf etdirməliyik. Məqsədimiz uşaqları böyük futbola hazırlamaqdır. Onlar artıq böyük futbola doğru ilk addımlarını atırlar. Bizim üçün əsas məsələ inkişafdır, çempionluq isə 2-ci plandadır.

Bahar Rüstəm