I Liqanın ötən turu ən çox danışılan futbolçulardan biri də "Baku Sportinq"in hücumçusu Elşad Tağıyev oldu. 24 yaşlı hücumçu "Cəbrayıl"la Şamaxıda keçirilən qarşılaşmada het-trik etməklə komandasına vacib qələbə qazandırdı və sona 2 tur qalmış "Baku Sportinq"in liderlər qrupundan ayrı düşməsinə imkan vermədi.

Prosport.Az–ın Şamaxıya ezam olunmuş əməkdaşı Elşad Tağıyevdən müsahibə götürüb.

– Geridönüş edərək 3:2 hesablı çox vacib qələbə qazandınız. Oyunla bağlı nə deyə bilərsiniz?
– Çətin oyun oldu. Belə olacağını da bilirdik. Bilmirəm nədəndir, həmişə Şamaxı Olimpiya Mərkəzinin stadionu bizə ağır gəlir. Amma şükür Allaha, yenə də qələbə qazanmağı bacardıq.

– Het-trik etdiniz. Bu 3 qoldan hansını ən gözəl adlandırardınız?
– Sonuncu vurduğum yaxşı alındı. Bunadək cari mövsüm 2 qol vurmuşdum. Sonra zədəm oldu deyə, bir müddət oynamamışdım.

– Çoxları bilmir. "Turan Tovuz"un sabiq futbolçusu Akif Tağıyevlə də qohumluq əlaqələriniz var...
– Bəli, o mənim əmimoğludur. Demək olar ki, bunu yalnız tanışlarım bilir. 12 yaşınadək Tovuzda yaşamışam. Sonra "Qəbələ" Akademiyasına keçmişəm.

– Qışda Premyer Liqa klubu "Qəbələ"dən I Liqa klubu "Baku Sportinq"ə keçidinizi necə qiymətləndirirsiniz?
– Səhvi özümdə görürəm. Şansımı dəyərləndirməliydim. Qış fasiləsinədək "Qəbələ"də 12 oyun keçirmişdim. Yəqin ki, hazır deyildim. Orada alınmadı deyə, başqa yerdə özümü doğrultmaq istədim.

– "Turan Tovuz" avrokuboklarda çıxış edəcək. Yetirməsi olduğunuz klubun uğuru sizi sevindirməyə bilməz...
– Əlbəttə ki, buna sevinirəm. "Turan Tovuz", demək olar ki, öz komandamdır. Tovuzluyam, hər oyunlarını da izləyirəm. İnşallah ki, Avropada da yaxşı nəticələr göstərəcəklərinə inanıram.

Səbuhi Musa