AFFA Gənclər Liqasının II mərhələsinin VII turunda "Sabah" səfərdə "Qarabağ"ı 3:0 hesabı ilə məğlub edib.

Matçdan sonra "Sabah"ın futbolçusu, 30 qolla liqanın bombardiri olan Anar Hüseynov Prosport.Az-a müsahibə verib.

– Oyunla bağlı fikirlərinizi bölüşərdiniz...
– Çətin və gərgin oyun oldu. "Qarabağ" güclü rəqibdir. Buna baxmayaraq, oyuna yaxşı hazırlaşmışdıq. Tapşırıqları meydanda düzgün yerinə yetirdik və qələbə qazandıq. Komanda olaraq sona qədər mübarizə apardıq.

– Böyükhesablı qələbəni gözləyirdiniz?
– Açığı, belə hesab gözləmirdik. Əsas məqsədimiz qalib gəlmək idi. Şanslarımızdan düzgün istifadə etdik və hesab bizim xeyrimizə oldu.

– Hazırda liqanın bombardirisiniz. Bu göstərici sizin üçün nə ifadə edir?
– Əlbəttə, 30 qol vurmaq sevindiricidir. Amma mənim üçün əsas olan komandanın uğurudur. Komandama kömək edə bilirəmsə, bu məni daha çox sevindirir.

– Çempionluq şanslarınızı necə qiymətləndirirsiniz?
– Qarşıda hələ oyunlar var və mübarizə davam edir. Hər matça final kimi yanaşırıq. Məqsədimiz qalan görüşlərdə də qalib gəlib mövsümü uğurla başa vurmaqdır.

Bahar Rüstəm