Azərbaycanın daha bir cüdoçusu beynəlxalq yarışda hakim haqsızlığı ilə üzləşib.

Prosport.Az-ın xəbərinə görə, son Avropa çempionatının bürünc medalçısı Turan Bayramov Qazaxıstanın paytaxtı Astanada keçirilən Qazaxıstan Barışı Böyük Dəbilqə yarışında xəstəxanaya aparılmalı olub.

Belə ki, 66 kq-da çıxış edən 24 yaşlı idmançımız Matteo Piras (İtaliya) və Vilian Limadan (Braziliya) üstün olsa da, 1/4 finalda yerli idmançı Akıljan Jubatkanovla (Qazaxıstan) görüşdə uduzdurulub. Belə ki, rəqib idmançı onun çənəsinə zədə yetirsə də, qayda pozuntusu qeydə alınmayıb. 

Nəticədə Turan Bayramov Astanada xəstəxanaya aparılıb. Bu səbəbdən onun bürünc medal üçün Ənvərcon İbrohimovla (Özbəkistan) təsəlliverici görüşə çıxması da mümkün olmayıb.

Qeyd edək ki, ötən ay Gürcüstanın paytaxtı Tiflisdə keçirilmiş Avropa çempionatı zamanı da yerli idmançılarla görüşlərdə Azərbaycan idmançılarına qarşı hakimlərin səhv qərarları müşahidə olunmuşdu.