AFFA Gənclər Liqasının II mərhələsinin VII turunda “Qarabağ” doğma meydanda “Sabah”a 0:3 hesabı ilə məğlub olub.

Matçdan sonra “Qarabağ”ın futbolçusu Əli İbrahimi Prosport.Az-a müsahibə verib.

– Oyun haqqında nə deyə bilərsiniz?

– Ağır oyun keçdi. Hər şeyə baxmayaraq, 1-ci hissədə yaxşı çıxış etdik. 2-ci hissədə isə nə baş verdiyini tam anlaya bilmədik. Qol buraxdıq və belə vacib matçlarda qol buraxanda istər-istəməz komanda ruhdan düşür. 1 oyunda onlar qalib gəldi, 1-də isə biz. Hazırda yenə də turnir cədvəlinin ilk pilləsindəyik. Qarşıdakı matçlara köklənəcəyik və məqsədimiz qalan 3 oyunu da qazanaraq çempion olmaqdır.

– Bu məğlubiyyətdən sonra çempionluq şanslarınızı necə dəyərləndirirsiniz?

– Çempionluq şansımız hələ də davam edir. Qarşıda 3 oyunumuz var və həmin rəqiblərin hamısını I dövrədə məğlub etmişik. Buna görə özümüzə inanırıq. İnşallah, hər 3 oyunda qalib gəlib, çempion olacağıq.

– Millinin toplanışı səbəbindən oyunlar arasında fasilə azalıb. Bu amil komandaya nə dərəcədə təsir edir?

– 3 gündən bir oyun keçirmək həqiqətən çətindir. Yorğunluq istər-istəməz hiss olunur. Amma bu qrafikə uyğunlaşmağa və oynamağa məcburuq.

Bahar Rüstəm