I Liqanın 17 qolla bombardiri, MOİK-in futbolçusu Seyxan Fərəcovun Prosport.Az saytına müsahibəsi
– Rəqib II Liqaya düşmə zonasında olan "Şimal" olsa da, son turda Şamaxıda onlara qalib gələ bilmədiniz. Məğlubiyyətdən də son dəqiqələrdə qurtuldunuz. Oyunla bağlı nə deyə bilərsiniz?
– Meydana qələbə üçün çıxmışdıq, son 2 oyunda məğlub olmuşduq. "Şəfa" və "Şahdağ Qusar"la həmin oyunlarda qol da vura bilməmişdik. Özüm də qol vurmaq istəyirdim ki, bombardirlikdə yerimi möhkəmlədim. Qalib gələ bilməsək də, şükür Allaha ki, "qol orucu"mu pozdum.
– Son dəqiqələrdə 1 qol vurmaq şansınız da oldu. Həmin qol olsaydı, qələbə qazanmışdınız. O epizodda niyə fərqlənə bilmədiniz?
– İlk əvvəl topa çatmadım. Çatanda da rəqib müdafiəçi topu çıxardı.
– Sona 2 tur qalıb. MOİK-in nə Premyer Liqaya çıxmaq şansı, nə də II Liqaya düşmək ehtimalı var. Oyunlara necə motivasiya ola bilirsiniz?
– Əslində düz deyirsiniz. Böyük ehtimalla, çempionatı 6-cı yerdə bitirəcəyik. Sağ olsun uşaqlar. Onlar istəyir ki, bombardir olum. Mənim üçün meydana çıxırlar. Şərait yaradırlar ki, mən qol vurum. Həm də özümüzə görə oynayırıq. Yaxşı oynamaq istəyirik ki, növbəti mövsüm üçün daha yaxşı təkliflər alaq.
– Növbəti turu Mingəçevirdə oynayacaqsınız. Rəqibin maliyyə problemləri var, son turda da "Şahdağ Qusar"a uduzdular. Sözün yaxşı mənasında "Mingəçevir"in durumundan öz xeyrinizə lazımınca yararlana biləcəksiniz?
– Əlbəttə, hər oyuna qələbə üçün çıxırıq. Elə oyun yoxdur ki, həvəssiz çıxış edək və ya 1 xal üçün mübarizə aparaq. Belə bir şey yoxdur. Hər oyuna 3 xal üçün çıxırıq. Elə olur ki, alınır, elə də olur ki, alınmır. Demək olar ki, bütün oyunlarda dominant çıxış edirik. Amma bəzən son ötürmə, son zərbə probleminə görə qələbə qazana bilmirik. Mingəçevirə də 3 xal üçün gedəcəyik. Hazırda 3-cü sıradadırlar. Premyer Liqada komanda sayı artırılmasa, çox güman ki, pley-offa da düşməyəcəklər. Son məğlubiyyətdən sonra, demək olar ki, 2-ci yer şansları da bitdi.
– Qış fasiləsində sizi "İmişli" istəmişdi, lakin MOİK buraxmamışdı. Mövsümün 2-ci yarısında Premyer Liqada oynamadığınıza görə təəssüf hissi keçirdiniz?
– Əslində təəssüflənmişdim. Çünki uşaqlıqdan məqsədim Premyer Liqada oynamaq olub ki, milli komandaya yolum açılsın. Özümüz yaxşı bilirik ki, nə qədər qol vursan da, I Liqadan milliyə çağırılmaq çətin məsələdir. Premyer Liqada 17 qol vursam, 100% milliyə çağırılacağam (gülür)... Amma hər işdə bir xeyir var. Özümə məqsəd qoydum ki, burada bombardir olum və Premyer Liqaya bombardir kimi yollanım.
– Mövsümün sonunda müqaviləniz MOİK-lə bitir. Özünüzü Premyer Liqada, yoxsa xaricdə görürsünüz?
– Sizə bir insayd məlumatı verim. Artıq "İmişli" ilə 2 illik müqavilə bağlamışam. İndiki klubumdan da bunu bilirlər. İyunun 1-dən "İmişli"nin futbolçusu sayılacağam. İnşallah, qollarıma Premyer Liqada da davam edəcəyəm. Qarşıma məqsəd qoymuşam ki, milliyə düşüm.
Səbuhi Musa