AFFA Gənclər Liqasının II mərhələsinin VI turunda "Zirə" – "Qarabağ" matçı 2:2 hesablı heç-heçə ilə başa çatıb. 

Oyundan sonra meydan sahiblərinin baş məşqçisi Sahil Cəfərov Prosport.Az-a müsahibə verib.

– Oyunla bağlı fikirləriniz...
– Bizim əvvəldən məqsədimiz xarakterli komanda formalaşdırmaq idi. İlk “6-lığ"a düşəndən sonra isə hədəfimiz çempionluq uğrunda mübarizə aparmaq oldu. Bəzi məqamlarda rəqibdən geri qaldıq. Amma yenə də irəli baxırıq. Hər komandaya eyni yanaşırıq. Əsas məsələ uşaqların inkişafıdır, gələcəkdə daha yaxşı futbol oynamalarıdır. Bizim üçün ən vacib məsələ budur.

– "Zirə"nin digər yaş qrupları (əvəzedici komanda və U-16) bu həftə "Qarabağ"a böyük hesabla məğlub olub. Yalnız sizin komandanız liderdən xal ala bildi. Bu haqda nə deyə bilərsiniz?
– Əvəzedicilər Liqasında da "Qarabağ"ın heyətində əsas komandadan gələn futbolçular var idi. Elvin Cəfərquliyev və Abbas Hüseynov oynayırdı. Bizim akademiya üçün qalib gəlmək və ya uduzmaq əsas deyil. "Zirə" Akademiyası olaraq başlıca məqsədimiz uşaqların inkişafıdır. Rəqiblərimiz də çox yaxşıdır. Həftəiçi "Qəbələ" ilə oyunumuz var. Onlar da yaxşı komandadır. İstəyimiz keyfiyyətli komanda yaratmaqdır.

– Son dəqiqələrdə yaşanan dava nə ilə bağlı idi?
– Mən dəqiq görmədim. Rəqib futbolçular aqressiv idi. Son dəqiqədə qol buraxıb qələbəni əldən verdilər. Nəsə baş verdi. Uşaqları dərhal uzaqlaşdırdıq. Bizim kimisə çempionluqdan etmək kimi niyyətimiz yoxdur. "Zirə"nin öz yolu var.

Bahar Rüstəm