AFFA Gənclər Liqasının (U-19) II mərhələsinin VI turunda "Zirə" – "Qarabağ" matçı 2:2 hesablı heç-heçə ilə başa çatıb.

Matçdan sonra qonaq komandanın baş məşqçisi Rəşad Sadiqov Prosport.Az-ın suallarını cavablandırıb.

– Oyunla bağlı fikirləriniz necədir?
– Açığı, çox çətin oldu. Çünki əvvəlki oyunda öz meydanımızda "Zirə"yə 3:0 hesabı ilə qalib gəlmişdik və kifayət qədər epizodlarımız olmuşdu. Bu meydança ("Rekord Arena"nı nəzərdə tutur – red.) futbol oynamaq üçün uyğun deyil. Səthi çox bərbad vəziyyətdədir, hər tərəfində əyrilik var. 2-3 normal ötürmə vermək mümkün olmur. Belə meydançada futbol oynamaq zülmdür. Buna baxmayaraq, 1 xal qazandıq. Amma düşünürəm ki, 2 xal itirdik. Çox yaxşı oynadıq, çoxlu qol epizodlarımız oldu. Sadəcə, istifadə edə bilmədik.

– Hakim idarəçiliyindən razı qaldınız?
– Hakimlik baxımından ciddi problem yox idi. Oyunu çox yaxşı idarə etdilər. Sadəcə, ilk hissənin əvvəllərində penalti epizodu oldu, onu buraxdılar. Ümumilikdə normal idarəçilik idi. Oyun bitəndə də gedib əllərini sıxdım.

– Oyundan sonra rəqib futbolçularla sizin oyunçular arasında mübahisə yaşandı. Nə baş verdi?
– Açığı, tam görmədim. Anladığım qədərilə hər iki komandadan futbolçular arasında söz atışması olub. Belə hallar olur. Oyunun sonunda gərginlik var idi. İstər-istəməz intriqa yaranır.

– Uşaqların psixoloji durumu necədir?
– Mövsümün sonuna 4 tur qalıb. Turnir cədvəlində 1-ci yerdəyik və rəqiblərimizi 4 xal qabaqlayırıq. Hələ də çempionluq uğrunda mübarizə aparırıq. Biz o komanda deyilik ki, bir heç-heçədən sonra motivasiyamız düşsün. Lider komandanın motivasiyası aşağı olmaz.