Heydər Əliyev Fondunun təşəbbüsü ilə keçirilən “Bakı Marafonu-2026″ya yekun vurulub.

Prosport.Az xəbər verir ki, “Küləyə qalib gəl” şüarı ilə keçirilən yarışa 25 min iştirakçı qatılıb. Marafonda Azərbaycan vətəndaşları ilə yanaşı, ABŞ, Almaniya, Böyük Britaniya, Çin, Gürcüstan, Qazaxıstan, Qırğızıstan, Özbəkistan, Rusiya, Türkiyə, Ukrayna və digər ölkə təmsilçiləri də yarışıb.

Marafonda finiş xəttinə kişilər arasında ilk çatan idmançı Türkiyədən Əhməd Alkanoğlu olub. 2-ci yerdə ukraynalı Vitali Şafar, 3-cü yerdə isə Qırğızıstan təmsilçisi Yrskeldi Akerov qərarlaşıb. Qadınların mübarizəsində Rusiyadan Yelena Tolstıx 1-ci, Azərbaycandan Anna Yusupova 2-ci, Qazaxıstandan Şirin Akimbay 3-cü yerin sahibi olub.

“Neftçi” İdman Klubu da böyük heyətlə marafona qatılıb. Klub təmsilçilərindən Xədicə Eyvazova, Vəfa Abdullayeva, Leyli Əliyeva, Elvin Astanov, İmran Qarayev və Vladislav Kalmıkov 21 km məsafəyə qaçıb. Səma İbrahimova, Sahil Məmmədov, Nərmin Hüseynli və Rübabə Hacızadə isə 42 km məsafəni tam qət edərək finişə çatıb.

Qeyd edək ki, sayca 9-cu dəfə keçirilən “Bakı Marafonu” ilk dəfə 42 kilometr tam məsafədə təşkil olunub. Yarış Dövlət Bayrağı Meydanından start götürüb və iştirakçılar müəyyən edilmiş marşrut üzrə “Sea Breeze” ərazisində finiş xəttinə çatıb. 21 km yarımmarafon məsafəni qət edən ilk 2000 iştirakçıya medal təqdim olunub.