AFFA U-17 Liqasının II mərhələsinin XI turunda “Şəfa” doğma meydanda “Qarabağ”a 0:1 hesabı ilə məğlub olub. 

Oyundan sonra “Şəfa”nın baş məşqçisi Hüseyn Axundov Prosport.Az-a müsahibə verib.

– Oyunla bağlı fikirlərinizi bölüşərdiniz.
– Rəqibi təbrik edirəm. Vüqar müəllimin (Vüqar Əsgərli – red.) yaxşı komandası var. Oyun gərgin oldu, hər iki tərəf üçün çətin keçdi. Xüsusilə oyunun son 10 dəqiqəsi gərgin mübarizə şəraitində keçdi. Məqsədimiz ən azı qol vurub 1 xal qazanmaq idi. Alınmadı. Uşaqların canı sağ olsun, yaxşı mübarizə apardılar.

– Çoxlu qol epizodlarınız oldu, lakin dəyərləndirə bilmədiniz. Sizcə səbəb nə idi?
– Məncə uşaqların ustalığı çatmadı. Əsas odur ki, oyunda səhvlərimizi analiz edəcəyik. Məşqlərdə bu səhvləri düzəldib növbəti oyunlarda daha yaxşı çıxış etməyə çalışacağıq. Yaxşı nəticələr üçün mübarizə aparacağıq.

– Komandanın bu mövsümki hədəfləri nələrdir?
– Komanda ilk yarananda əsas hədəfimiz ilk "8-liy"ə düşmək idi. Bunu bacardıq. Burada qarşımıza heç bir çempionluq hədəfi qoyulmayıb. Bacardığımız qədər qələbələr qazanıb turnir cədvəlində yuxarı pillələrdə olmaq istəyirik. Hazırda bunu bacarırıq. Komandamıza güvənimiz və inamımız çoxdur. İnşallah, daha yaxşı nəticələr qazanacağıq.

– Növbəti oyun səfərdə “Kəpəz”ə qarşı olacaq. Gözləntiləriniz necədir?
– Oyuna hər komanda kimi qələbə üçün çıxacağıq. Məqsədimiz budur. İnşallah, bacaracağıq.

– Gələn il keçiriləcək U-20 dünya çempionatında iştirak edəcək potensialda milli futbolçu heyətinizdə varmı?
– Hazırda heyətimizdə 1-2 futbolçu var ki, onların həqiqətən milli komandanın tərkibində çıxış etmək potensialı var.

Bahar Rüstəm