AFFA U-17 Liqasının II mərhələsinin XI turunda “Qarabağ” səfərdə “Şəfa” üzərində 1:0 hesablı qələbə qazanıb.

Oyundan sonra “Qarabağ”ın baş məşqçisi Vüqar Əsgərli Prosport.Az-a müsahibə verib.

– Oyunla bağlı fikirləriniz...
– Matçın müəyyən hissələrində planlaşdırdığımız oyun modelini meydanda görə bildik. Xüsusilə topa sahib olarkən səbirli quruculuq və top itkisindən sonra reaksiyalarımız müsbət idi. 1:0 hesablı qələbə qazandıq, amma bizim üçün əsas məsələ yalnız nəticə deyil, komandanın inkişaf prosesidir.

– Komandanın oyunundan razı qaldınız?
– Komandanın münasibətindən və meydandakı intizamından razıyam. Futbolçular həftə ərzində məşqlərdə işlədiyimiz prinsipləri tətbiq etməyə çalışdı. Xüsusilə keçid anlarında və pressinq reaksiyalarında inkişaf görünürdü. Əsas məqsədimiz futbolçuların hər oyunda daha yaxşı qərarlar verməsi və oyun modelinə daha uyğun davranmasıdır.

– Komandanın çempionluq şansı nə qədər qalıb?
– Çempionluq barədə danışmaq üçün hələ tezdir. Bizim əsas fokusumuz uzunmüddətli inkişafdır. Komanda hər həftə həm fərdi, həm də kollektiv olaraq inkişaf etməlidir. Əgər bu yanaşmanı davam etdirə bilsək, nəticələr və turnir cədvəlindəki vəziyyət də öz-özünə formalaşacaq.

– Liqadakı rəqabət səviyyəsini necə dəyərləndirirsiniz?
– Liqada rəqabət səviyyəsinin artdığını düşünürəm. Demək olar ki, hər oyun yüksək intensivlik və taktiki mübarizə ilə keçir. Akademiya səviyyəsində bizim üçün ən vacib məsələ yalnız nəticə deyil, futbolçuların oyun anlayışını, qərarverməsini və oyun modelinə uyğun inkişafını təmin etməkdir. Komandalar arasında fərqli oyun üslublarının görünməsi də sevindiricidir. Bəzi komandalar topa sahib olmağa, bəziləri isə keçid oyunlarına üstünlük verir. Bu isə gənc futbolçuların müxtəlif oyun situasiyalarına uyğunlaşmasına kömək edir. Ümumilikdə liqanın inkişaf etdiyini düşünürəm. Daha intensiv, daha taktiki və daha rəqabətli oyunlar görürük. Bu da futbolçuların gələcəkdə peşəkar səviyyəyə hazırlanması baxımından vacibdir.

Bahar Rüstəm