Azərbaycan klublarından "İmişli" və "Kəpəz" rəsmiləri ötən ay futbolçu seçimləri üçün Afrikaya – Nigeriyanın paytaxtı Laqosa yollanmışdı.

Səfərdə olanlar içərisində  "İmişli"nin idman direktoru Tamerlan Bəkirzadə də olub. O, Prosport.Az-a bu barədə müsahibə verib.

– Səfər necə keçdi? Bəyəndiyiniz futbolçular oldumu? 
– Bəli, son seleksiya prosesində 8 perspektivli oyunçu diqqətimizi cəlb etdi. Onların hər biri həm texniki bacarıqları, həm oyun intellekti, həm də meydandakı davranışı ilə seçildi. Biz seçim zamanı psixoloji hazırlığa da xüsusi önəm verdik. Bu futbolçular müxtəlif mövqelərdə çıxış edir. Onlar arasında hücumçu, cinah yarımmüdafiəçisi, mərkəz yarımmüdafiəçisi və mərkəz müdafiəçisi var. Hamısı 16-18 yaş aralığındadır və düşünürük ki, düzgün yanaşma ilə gələcəkdə yüksək səviyyəli oyunçular ola bilərlər.

– Gələn mövsümdən həmin futbolçuları akademiyada görə biləcəyik?
– Düşünürəm ki, bu futbolçuların növbəti mövsümdə akademiyamızda çıxış etməsi üçün real şans var. Hazırda onlarla danışıqlar son mərhələdədir və razılıq əldə olunmaq üzrədir. Əsas məqsədimiz onları sadəcə komandaya cəlb etmək deyil, həm də inkişafları üçün ən doğru mühiti yaratmaqdır. Ümid edirəm ki, yaxın zamanda bütün məsələlər həll olunacaq və bu gənc istedadlar rəsmi olaraq klubumuzun formasını geyinəcək.

– Kimlərlə müqavilə bağlanılacaq?
– Yekun olaraq 3 futbolçu ilə müqavilə bağlanılacaq. Bunlar Merşaet Bassi, Abdulla Apatira və Manka Kabolahandır. Adını çəkdiyim ilk futbolçu 2009-cu il, digər 2 oyunçu 2008-ci il təvəllüdlüdür.

– Bəs onlar hansı mövqedə çıxış edir?
– Onlar müvafiq olaraq mərkəz müdafiəçisi, dayaq yarımmüdafiəçisi və hücumameyilli mərkəz yarımmüdafiəçisi qismində oynayır.

– Bütün bu oyunçular hansı akademiyadan cəlb olunub?
– Nigeriyanın "Boks-tu-boks" Akademiyasından (Box2box Academy).

– Növbəti səfərlər hansı bölgələrə nəzərdə tutulub?
– Növbəti səfərlərimiz Avropaya, xüsusilə Portuqaliyaya planlaşdırılıb.

Bahar Rüstəm
Səbuhi Musa