Əvəzedicilər Liqasının XXIV turunda “Qarabağ-2” doğma meydanda “Zirə-2”ni 5:1 hesabı ilə məğlub edib.
Matçdan sonra Ağdam klubunun baş məşqçisi Maksim Medvedev Prosport.Az-a müsahibə verib.
– "Zirə"yə 5:1 qalib gəldiniz. Oyunla bağlı fikirləriniz...
– Qalib gəldik. Bu, Əvəzedicilər Liqasıdır və əsas liqadan fərqlənir. Buraya əsas komandadan da oyunçular gəlir. Bu gün Elvin Cəfərquliyev və Abbas Hüseynov bizə kömək etdi. Ona görə də oyunumuz daha rahat alındı. Yaxşı qol imkanlarımız oldu. Hesab daha böyük ola bilərdi. Buna da şükür, 3 xalımızı qazandıq.
– Elvin və Abbasın olması oyuna necə təsir etdi?
– Əlbəttə ki, onların yanında oynamaq futbolçulara motivasiya verir. Təcrübələri yüksəkdir. Onlarla oynayanda futbolçular özlərini daha rahat hiss edir, meydanda istədikləri kimi oyun qura bilirlər. Danışıqları, jestləri, bir-birlərinə ötürdükləri işarələr gənc futbolçulara kömək edir.
– Həm Elvin, həm də Abbas əvəzedici komandada debüt matçındaca qol vurdu. Bu barədə nə deyə bilərsiniz?
– Normaldır. Hər ikisi hücumameyilli müdafiəçidir. Daim hücuma qoşulurlar. Burada səviyyə o qədər də yüksək deyil. Amma bu onlar üçün də böyük motivasiyadır. Danışığımız olub ki, burada oynasanız da, çalışın ki, geri qayıdanda performansınızda eniş olmasın.
– Onlar bir müddətdir ki, əsas komanda ilə məşq etmirlər. Fiziki və psixoloji hazırlıqları hansı səviyyədədir?
– Aydın məsələdir ki, bura gəlməyi psixoloji zərbə kimi qəbul ediblər. Amma danışmışıq. Başa düşürlər ki, situasiya nə yerdədir. Bir tərəfdən psixoloji yorğunluq da var. Hansısa hərəkətlərini idarə edə bilmirlər, hansısa sözü qəbul etməkdə çətinlik çəkirlər. Çünki psixoloji cəhətdən yorğundurlar. Həm millidə, həm çempionatda, həm də burada oynayırlar. Bu da təzyiq yaradır. Amma performanslarına baxanda görürsən ki, necə məşq edirlər. Çalışırıq ki, əsas komandada hansı çətinliklər varsa, burada həll edək ki, sabah problem olmasın.
– Nə qədər müddət əvəzedici komandada olacaqları ilə bağlı məlumat verilib?
– Xeyr, elə bir söhbət olmayıb. Aydın məsələdir ki, heç kim onların üstündən xətt çəkməyib. Bu, ümumi situasiyadan irəli gələn bir durumdur. Baş məşqçi Qurban Qurbanov qərar verib ki, hazırda onların burada olması daha yaxşıdır. Onları çox sevdiyindən belə edir. İstəmir ki, yollar ayrılsın. İnsan kimisə çox istəyəndə bəzən ikiqat cəza verir ki, bir daha təkrarlanmasın.
– Əvəzedici komandaya göndərilmiş daha bir futbolçu – Sami Mmae heyətdə yoxdur. Əvəzedici komanda ilə matçlara çıxacaq?
– Belə deyim ki, Sami Mmae bizimlə məşq etmir. Artıq menecerlər arasında danışıqlar gedir. Necə nəticələnəcəyini bilmirəm. Amma bilirəm ki, hazırda Azərbaycanda deyil.
Müsahibəni aldı: Səbuhi Musa
Videonu çəkdi: Bahar Rüstəm