Gürcüstanın Batumi şəhərində keçirilən ağırlıqqaldırma üzrə Avropa çempionatı Azərbaycan üçün başa çatıb.

Prosport.Az-ın xəbərinə görə, 110 kq çəki dərəcəsində çıxış edən gənclər arasında Avropa mükafatçımız Əli Şükürlü ümumilikdə 361 kq qaldırmaqla 13-cü olub.

O, birdən qaldırmada 166 kq-ın öhdəsindən gəlməklə 11-ci, təkanla qaldırmada 195 kq-ı ram etməklə 15-ci yeri tutub.

B qrupunda onun rəqibləri Benjamen Fere (Fransa), Yevgeni Yantseviç (Ukrayna), Kamerun doğumlu Sirill Çaçe (Böyük Britaniya), Rusiya əsilli Artur Muqurdumov (İsrail), Viktor Sund (İsveç), Neylas Qineykis (Litva), yunan əsilli Yakob Diakovasilis (Danimarka), İran əsilli Rebin Rzazadə (Finlandiya) və Tudor Çobanu (Moldova) olub.

Bundan başqa, C qrupunda 8 idmançı yarışıb. Bunların 3-ü (2 şotlandiyalı, 1 CAR idmançısı) müsabiqədənkənar çıxış edib. 10 idmançı isə A qrupunda mübarizə aparıb.

Sonda 415 kq-ı qaldırmış 22 yaşlı Qarik Karapetyan (Ermənistan) 3-cü dəfə Avropa çempionu olub. 414 kq-la Luis Lauret (Rumıniya) ardıcıl 2-ci dəfə Avropa 2-ciliyini tutub. 412 kq qaldırmış Avropa çempionu Xristo Xristov (Bolqarıstan) isə 3-cü yeri tutub.

Qeyd edək ki, Azərbaycan bu yarışda 4 idmançı ilə təmsil olunub. Avropa çempionatına bu gün yekun vurulacaq. Son gündə Azərbaycandan heç bir idmançı çıxış etməyəcək.