Qurban Qurbanov ölkə futbolunun simvoludur. Qurban Qurbanov Azərbaycan futbolunun özüdür. Qurban Qurbanov 15 ildir ki, Azərbaycanda futbolun yaşaması üçün ona nəfəs verən şəxsdir...
Qurban Qurbanov mübaliğəsiz bütün bu təriflərə layiq şəxsdir.
Ancaq Azərbaycan çoxdan şəxsiyyətə pərəstiş dövrünü adlayıb. Uzaq 53-cü ildən sonra şəxsiyyətə pərəstiş yığışdırılıb. İndi mətbuatda ölkə başçısından tutmuş ən xırda məmuradək tənqid edənə "gözün üstə qaşın var" deyən yoxdur.
Bəs stalinizmin dəyərlərini qorumağa saxlayan qüvvələr nə edir? Bəllidir, ürəkdə Qurban Qurbanov sevgisi var. Və bu sevgi bəzən gözləri örtür. Qurban Qurbanov qalıb kənarda, bu insanlar Qurbanovu tənqid edənlərə ağıl öyrədir. Axı, məhz sizin kimi şəxslərə görədir ki, illərdir Qurban Qurbanov özünün bütün qərarlarının düzgün olduğunu bilir. Sizin inandığınız Quran haqqı, Allah elə bir insan yaratmayıb ki, o, səhvsiz olsun. Və mətbuatın işi o səhvi göstərməkdir...
Əgər mətbuat quzu balası kimi konfransda yatacaqsa, o zaman bu konfranslar sizin dədə-babalarınızın əl çaldığı Kommunist Partiyasının Mərkəzi Komitəsinin iclasından nə ilə seçiləcək? Heçmi Türkiyədə "İmperator" sayılan Fatih Terim tənqid olunmayıb? Adam "Qalatarasaray"a bəlkə də heç zaman qazana bilməyəcəyi UEFA Kuboku və Superkubokunu qazandırıb. Keçmişə görə sağ ol, amma bu günə görə səhvin varsa, tənqid olunmalısan.
Sənin işin baş məşqçilikdirsə, bizim işimiz də yazmaq, lazım gəlsə, tənqid etməkdir. Necə ki, siz uğur qazananda sizi az tərifləməmişik, hətta peşəkarlığa yaraşmasa da, bəzən konfrans zalına ayaq basdığınız ilk anda sizi alqışlamışıqsa, indi də xahiş edirik, tənqidləri qəbullanmağı bacarın...
Dünənki mətbuat konfransında həmkarımın yanlış əvəzetmələrlə bağlı verdiyi suala "sən bunu anlamırsansa, bunu sənə başa salmağım uzun vaxt çəkər" cümləsi heç də təcrübəli mütəxəssisə yaraşmadı. İnciməyin, Qurban müəllim, mən həmkarımın yanındayam... Necə ki, siz futbolçularınızı hamıdan üstün sayırsınız, onlara etdikləri kobud səhvlərə görə dəstək olursunuz, inciməyin, mən də həmkarımın yanındayam...
Səbuhi Musa