Gürcüstanın paytaxtı Batumidə keçirilən ağırlıqqaldırma üzrə Avropa çempionatında birdənqaldırmada gümüş medal qazanan İsa Rüstəmov müsahibə verib.

26 yaşlı idmançı Prosport.Az-ın Batumiyə ezam olunmuş əməkdaşına müsahibə verib.

– Yarışı sizin üçün necə qiymətləndirmək olar?
– Normal keçdi. Şükür olsun ki, Azərbaycana əliboş qayıtmıram. Ancaq lap yaxşı da ola bilərdi. Deməli, öz üzərimdə daha çox çalışmalıyam. Bu səhvlərin digər yarışlarda olmaması üçün məşq edəcəyəm. Bura qızıl medal qazanmağa gəlmişdim. Bu dəfə alınmadı.

– Ötən il Moldovanın paytaxtı Kişinyovda keçirilmiş Avropa çempionatında 3 medal (1 böyük gümüş, 1 kiçik qızıl və 1 kiçik bürünc) qazanmışdınız. Bu dəfə 1 kiçik medalla kifayətləndiniz. Onda 67 kq-da idiniz, indi 71 kq-da. Yeni rəqiblər, çəki dəyişikliyi nə dərəcədə çıxışa təsir göstərdi?
– 71 kq-da böyüklərin Avropa çempionatında ilk yarışım idi. Yeni rəqiblərim Avropa çempionları, dünya çempionatının mükafatçıları idi. Lakin mən də özümü onlardan zəif hesab etmirdim. İslam Həmrəyliyi Oyunlarında da bu çəkidə çıxış etmişdim. Amma orada bundan aşağı nəticə göstərmişdim (orada 3 medal – 1 böyük bürünc, 1 kiçik gümüş və 1 kiçik bürünc qazanmışdı – red.). Bu yarışda ümumi cəmdə İslamiadada qaldırdığım ağırlıqdan 3 kq da artıq (327 kq) nəticə verdim. Heç kimdə səhv görmürəm. Ən böyük səhv yəqin ki elə mənim özümdədir. Görünür, məşqlərimdə hardasa səhlənkarlıq etmişəm ki, belə səhv oldu. Gələcəkdə bu səhvləri düzəldib, tək medalı 3 medala dəyişməyə, üstəlik qızıl medal qazanmağa çalışacağam.

– Birdən qaldırmada gümüş medal qazandınız. Bu barədə nə deyə bilərsiniz?
– Orada 147 kq-ı 2-ci cəhddə qaldıra bildim. 149 kq-ı da qaldıra bilmədim, ağırlığı saxlamağa çalışsam da, düşdü. Yenə deyirəm ki, idmançı səhvi heç kimdə yox, 1-ci özündə axtarmalıdır.

– Amma məşqdə bu çəkini rahat qaldırırdınız?
– Bəli. Amma məşq prosesində çəki dərəcəm 71 kq-dan 2-3 kq artıq olur. Bu da qismən də olsa ağırlığı qaldırmağa təsir edir.

– Təkanla qaldırmada risk var idi ki, 2 dəfə 178 kq-ı qaldıra bilmədiniz. Risk var idi ki, siz "sıfır"la bitirəsiniz?
– Bəli, belə risk vardı. Şükür Allaha, 3-cü cəhddə 180 kq-ı qaldırdım.

– Təkanla qaldırmada 4-cü oldunuz və ikiqat Avropa çempionu Qor Sahakyanla eyni – 180 kq-ı qaldırdınız. Sahakyan daha öncə bu çəkini sifariş verdiyindən, 3-cü o, 4-cü siz oldunuz. Bunu daha tez sifariş vermək olmazdı?
– Planımız vardı ki, rəqibləri aşağı çəki sifariş verməklə aldadaq. Belə daha yaxşı nəticə vermək olacağını düşünmüşdük. Ancaq 2 dəfə 178 kq-ı qaldıra bilməməyim planları pozdu. Burada məşqçilik bir şey yoxdur. Səhlənkarlıq məndədir. Bu ilin payızında Çində keçiriləcək dünya çempionatında çalışacağam ki, 3 medal əldə edim.

– Artıq bu çəki dərəcəsində qalacaqsınız?
– Olimpiadada çəki dərəcəsi 75 kq-dır. İnşallah, bu çəki dərəcəsində nailiyyətlər əldə edərəm.

Səbuhi Musa