Gürcüstanın Batumi şəhərində keçirilən ağırlıqqaldırma üzrə Avropa çempionatının 3-cü günündə İsa Rüstəmov (71 kq) yarışı kiçik gümüş medalla başa vurub.
Prosport.Az-ın Batumiyə ezam olunmuş əməkdaşının verdiyi xəbərə görə, İsa Rüstəmov təkanla qaldırmada 180 kq-ın öhdəsindən gəlsə də, 4-cü olub.
1-ci yeri Yusuf Fəhmi Gənç (185 kq), 2-ci yeri Yeqor Popov (183 kq) və 3-cü yeri Qor Sahakyan (180 kq) tutub. Erməni idmançı 180 kq-ı İsadan öncə sifariş verdiyindən bürünc medal onun olub.
Ümumi sıralamada isə 327 kq-ı qaldırmış İsa 4-cü olub. Yusuf Fəhmi Gənç (Türkiyə) 332 kq-la ardıcıl 2-ci dəfə Avropa çempionu olub, Qor Sahakyan (Ermənistan) 330 kq-la 2-ci yeri tutub, belaruslu Yeqor Popov (AIN) 328 kq-la bürünc medal qazanıb.
Qeyd edək ki, ötən il Moldovanın paytaxtı Kişinyovda keçirilmiş Avropa çempionatında İsa Rüstəmov 67 kq-da gümüş medal qazanmışdı. O, həmçinin birdənqaldırmada bürünc, təkanla qaldırmada isə qızıl medal əldə etmişdi.
19:50
Gürcüstanın Batumi şəhərində keçirilən ağırlıqqaldırma üzrə Avropa çempionatının 3-cü günündə İsa Rüstəmov (71 kq) birdən qaldırmada gümüş medal qazanıb.
Prosport.Az-ın Batumiyə ezam olunmuş əməkdaşının verdiyi xəbərə görə, ötən il Moldovanın paytaxtı Kişinyovda 67 kq-da gümüş medal qazanmış İsa Rüstəmov 147 kq-ı qaldırmaqla 2-ci yeri tutub.
1-ci yeri dünya mükafatçısı və ikiqat Avropa çempionu Qor Sahakyan tutub. Ermənistan idmançısı 150 kq-ı qaldırmaqla qızıl medal qazanıb. Türkiyəli dünya mükafatçısı və son Avropa çempionu Yusuf Fəhmi Gənç də 147 kq qaldırıb. Sadəcə, 147 kq-ı İsa ilk öncə sifariş verdiyi üçün türkiyəli idmançı 3-cü yeri tutub.
Qeyd edək ki, idmançımız az sonra təkanla qaldırmada gücünü sınayacaq.
10:46
Gürcüstanın Batumi şəhərində keçirilən ağırlıqqaldırma üzrə Avropa çempionatının 3-cü günündə Azərbaycanın daha bir idmançısı gücünü sınayacaq.
Prosport.Az-ın Batumiyə ezam olunmuş əməkdaşının verdiyi xəbərə görə, ötən il Moldovanın paytaxtı Kişinyovda 67 kq-da gümüş medal qazanmış İsa Rüstəmov bu dəfə çempionluq üçün yarışacaq.
Ötən il Səudiyyə Ərəbistanında keçirilmiş İslam Həmrəyliyi Oyunlarında 71 kq çəki dərəcəsində 3 medal (1 gümüş və 2 bürünc) qazanmış İsa Rüstəmov bu dəfə də eyni çəkidə mübarizə aparacaq.
26 yaşlı idmançımızın A qrupundakı rəqibləri bu atletlərdir: dünya mükafatçısı, ikiqat Avropa çempionu Kamerun doğumlu Bernarden Matam (Fransa), tatar əsilli rusiyalı dünya mükafatçısı Zülfət Qarayev (AIN), dünya mükafatçısı, ikiqat Avropa çempionu Qor Sahakyan (Ermənistan), Engin Kara (Türkiyə), Pyotr Kudvaşık (Polşa), belaruslu Yeqor Popov (AIN), dünya mükafatçısı və son Avropa çempionu Yusuf Fəhmi Gənç (Türkiyə), Avropa mükafatçısı Georgi Çerney (Moldova) və Dian Pamporciev (Bolqarıstan).
Daha 5 idmançı – Harison MakQroqan (İrlandiya), Conatan Çin (Böyük Britaniya), İvan Novko (Xorvatiya), Faris Durak (Bosniya və Herseqovina) və Maykl Fermer (Uels) səhər seansında B qrupunda çıxış edib.
Qeyd edək ki, dünən 60 kq-da Tehran Məmmədov B qrupunda çıxış edib. O, 14 idmançı arasında birdən qaldırmada 118 kq-ı qaldıraraq 8-ci olub. Tehran təkanla qaldırmada isə 142 kq-ın öhdəsindən gələrək 8-ci olub. Ümumi 260 kq çəki qaldırmış idmançımız yekunda da 8-ci olub. O, reytinqi yüksək idmançıların yarışdığı A qrupundan Marian Luka (Rumıniya), son Avropa çempionatının gümüş medalçısı Qoderdzi Berdelidze (Gürcüstan) və Narkis Papoltini (Rumıniya) qabaqlayıb.