Gürcüstanın paytaxtı Tbilisidə yarışı izləyənlər arasında əfsanəvi cüdo məşqçisi Tərlan Həsənov da vardı. O, tələbələri – Hidayət Heydərov (73 kq) və Murad Fətiyevə (90 kq) görə Gürcüstana gəlmişdi.
Prosport.Az-ın Gürcüstana ezam olunmuş əməkdaşı yarışdan sonra 83 yaşlı mütəxəssisdən fikirlərini öyrənib.
– Tələbəniz Murad Fətiyevə ümidlər çox idi. Lakin o, ilk görüşdə rumıniyalı Aleks Kretsə 2 vaza-ari xalı ilə uduzdu. Erkən uduzmağının səbəbini nədə görürsünüz?
– Murad tələsdi, fənd atdı. Əvvəl xalı ona verdilər, sonra qərarı dəyişdirib rəqibə vaza-ari xalını verdilər. Daha sonra vaxt bitirdi deyə, fənd etməyə tələsirdi. Bir də yıxıldı, 2-ci vaza-ari xalı rəqibə verildi. Çox tələsik güləşdi. Həm də onun sol qolu zədəlidir. Solaxaydır deyə, sol qolunu işlədə bilmirdi. Peruda güləşəndə ağrıdıcı fənd etmişdilər, hələ sağalmayıb. İndi həkimlər qərar verəcək: ya əməliyyat olunacaq, ya da müalicə alacaq.
– Hidayət Heydərovdan çoxları 5-ci Avropa çempionluğu gözləyirdi. Sizin fikrinizcə, finalda nə baş verdi?
– O hələ pik formasına çatmayıb. Tələsməyə ehtiyac yoxdur. Oktyabrda Bakıda dünya çempionatı olacaq. Onlar Tbilisiyə getməmişdən əvvəl təlim-məşq toplanışında onun hazırlıq prosesinə baxmışdım. O necə işləmək lazımdır bilir. İlk görüşdə rəqibi yunan idi, təmiz (ippon) qələbə qazandı. 2-ci görüşdə rəqibi Kosovodan idi, onu da təmiz (yuko) məğlub etdi. 3-cü görüşdə rəqibi fransalı idi. Çox güclü idmançıdır, gənclər arasında dünya çempionu olub. Ötən il Perudakı Qran-pridə ilk görüşdə Hidayəti təmiz yenmişdi (finala kimi getmişdi). Amma bu dəfə Hidayət onu təmiz fəndlə – çiyindən burma ilə ippona saldı. Finala çıxmaq üçün türkiyəli Bilal Çiloğlunu məğlub etməli idi. Onunla dəfələrlə güləşib, narahat, hündürboy idmançıdır. 1 ildir ki, yarışlarda görünmürdü, zədəsi vardı. Avropa çempionatında 2-ci dəfə 3-cü oldu. Hidayət onunla Qolden Skora getdi. Orada Hidayət onu çöndərib saxladı və 2-ci yuko ilə qələbə qazandı. Finalda gürcülərin əfsanəvi idmançısı Laşa Şavdatuaşvili ilə güləşdi. O, London Olimpiadasının çempionu, Rio Olimpiadasının 3-cüsü, Tokio Olimpiadasının isə 2-cisi olub. Dünya və Avropa çempionu olub, çox yaxşı idmançıdır. Görüş bərabər keçdi. Mənə elə gəlir ki, hakimlər bir az insaflıq etdi. 1-ci şidonu Hidayətə verdilər. 2-ci şido ona verilməməli idi, çünki Hidayət hücumda idi. Qolden Skorda Hidayət ondan üstün idi. Orada da birdən 3-cü şido xəbərdarlığını Hidayətə verib qələbəni gürcü idmançıya verdilər. Hidayət ömründə güləşməməyinə görə hansoku almayıb. Sadəcə 1 dəfə saçı açıq olduğuna görə 3-cü xəbərdarlıqla uduzub. Hakimlər insafsızlıq etdi. Amma hakimləri tam günahlandırmıram. Yerli idmançıya tərəf "işlədilər". Qələbəni rəqibə verdilər. Bu mənim fikrimdir.
– Tbilisidə özünüz də oldunuz. Hansı hisslər keçirdiniz?
– Çox həyəcan keçirdim. Amma neyləmək olar? Elə bilirdim ki, Hidayət onu məğlub edəcək. Özü də görüşə çox sakit və təmkinli çıxmışdı, rəqibindən çəkinmirdi. Hidayət ona bir dəfə – 17 yaşında Bakıda uduzub, ondan sonra isə 4 dəfə qalib gəlib. Bu məğlubiyyəti gözləməzdim. Amma hakimlərin işinə müdaxilə edə bilmirik. Düşünürdüm ki, Hidayət qızıl medal qazanacaq, amma əfsuslar olsun ki, alınmadı.
– Ümumilikdə 1 gümüş və 3 bürünc medal qazanan Azərbaycan millisinin çıxışı sizi nə dərəcədə qane etdi?
– Yenə də 3 bürünc, 1 gümüş medal pis deyil, amma əla da deyil. Həmişə 100%-lik nəticə gözləyirik, alınmır. Bu, Avropa çempionatıdır və Gürcüstan, Rusiya və Fransa millisi yarışa yaxşı hazırlaşmışdı. Azərbaycan da pis çıxış etmədi. Balabəy Ağayev də pis güləşmədi. 3-cü yer uğrunda millimizin üzvü Əhməd Yusifova uduzdu. Turan Bayramov da gözəl güləşdi, 3-cü oldu.
– Zelim Kotsoyevin 3-cü yer uğrunda görüşə buraxılmaması haqda nə deyə bilərsiniz?
– O, səhv etdi, rəqibin qolunu burdu, ona hansoku-make verdilər. Bu fəndə icazə verilmir. Həmin fəndi ayaqüstə Hidayətə Şavdatuaşvili etdi, amma hakim ona xəbərdarlıq vermədi. Zelim Kostoyevə isə nevaza – oturaq vəziyyətdə xəbərdarlıq etdilər. Çox qəliz vəziyyət idi.
Səbuhi Musa