"İlk hissədə komandamız yaxşı oynadı. Yaranan fürsətlərdən istifadə edə bilmədik və buna üzülürük. Oyunun gedişatını nəzərə alsaq, gələcəyə ən azı 1 futbolçu yetişdirə bilsək, bu bizim üçün uğur sayılar".

Bunu Prosport.Az-a "Qarabağ"ın 16 yaşadək komandasının (U-16) məşqçisi Emin Mollayev deyib.

O, AFFA U-16 Liqasının II mərhələsinin XII turunda “Neftçi”yə səfərdə 0:2 hesablı məğlubiyyətdən danışıb. Komanda oyuna atası rəhmətə getdiyi üçün baş məşqçi Rauf Əliyevin yoxluğunda çıxıb.

Suallarımızı cavablayan köməkçi məşqçi səhvlərin üzərində işləyəcəklərini bildirib: "2-ci hissədə boşluqlara yol verdik. Hissənin əvvəlində oyuna köklənə bilməmişdik. Uşaq futbolunda belə hallar olur. Əsas odur ki, səhvlərimizin üzərində işləyək və daha da yaxşılaşaq.

Əslində, bu nəticə komandaya müəyyən mənada mane olur. Təəssüf ki, bu imkanı əldən qaçırdıq. Rəqibimiz də Tovuz səfərində məğlub olmuşdu. Lakin uşaq futbolunda belə hallar normaldır. Bu, böyük futbol deyil ki, hansısa titul bizim üçün əsas məqsəd olsun. Maraqlıdır, amma həlledici əhəmiyyət daşımır. Qələbə qazansaq da, məğlub olsaq da, əsas diqqəti səhvlərimizin üzərində işləməyə yönəldirik".

O daha sonra bildirib ki, komanda beynəlxalq turnirlərdə qüvvəsini sınayacaq: "Komanda Niderland və Türkiyədə keçiriləcək beynəlxalq turnirlərdə iştirak edəcək. Bu turnirlər inkişafımıza müsbət təsir göstərəcək".

Bahar Rüstəm