Bu gün Azərbaycan ağırlıqqaldırma üzrə millisi Gürcüstanın Batumi şəhərində keçirilən Avropa çempionatında mübarizəyə qoşulur.
Prosport.Az-ın Gürcüstana ezam olunmuş əməkdaşının verdiyi xəbərə görə, bu gün Tehran Məmmədov 09:30-da başlayacaq B qrupunda mübarizəyə qatılacaq.
Dünən start götürmüş və aprelin 26-dək davam edəcək bu yarışla bağlı maraqlı fakt isə ondan ibarətdir ki, turnir Avropa çempionatı statusunda olsa da, burada Cənubi Afrika Respublikasından (CAR) idmançılar da yer alır. CAR-ı qadınlarda 86 kq-da Çeyenn Smit və kişilərdə +110 kq-da Kristofel Riders təmsil edəcək. Həmçinin, qaçqın olimpiya komandasından Kubadan Böyük Britaniyaya mühacirət etmiş Ramiro Mora Romero da yarışacaq.
Qeyd edək ki, 51 ölkə burada təmsil olunacaq. Maraqlısı bundadır ki, Böyük Britaniya ayrı, onun tərkibinə daxil olan İngiltərə, Şotlandiya, Uels, Şimali İrlandiya və Cəbəllüttariq ayrıca çıxış edəcək. Bundan başqa, Britaniya tərkibində avtonom fəaliyyət göstərən Cersi adasından Oliver Dodds gücünü göstərməyə çalışacaq. Bütün bu idmançılar 1930-cu ildən Britaniyanın keçmiş müstəmləkə dövlətləri və hazırkı avtonom statuslu subyektləri arasında keçirilən və Yay Olimpiya Oyunlarından sonra ən böyük multiidman yarışı sayılan Birlik Oyunlarına (Commonwealth Games 23 iyul – 2 avqustda Şotlandiyanın Qlazqo şəhərində keçiriləcək) lisenziya qazanmaq üçün çalışacaq. Yalnız Böyük Britaniyanı təmsil edən idmançıların nəticələri turnir cədvəlində nəzərə alınacaq.
Bu Avropa çempionatında Azərbaycanı 4 idmançı – Tehran Məmmədov (60 kq), son Avropa 2-cisi İsa Rüstəmov (71 kq), Ravin Alməmmədov (79 kq) və Əli Şükürlü (110 kq) təmsil edəcək. İsa və Ravin güclülərin yarışdığı A qrupunda, Tehran və Əli B qrupunda gücünü sınayacaq. İdmançılarımız qitə çempionatında müvafiq olaraq 20, 21, 22 və 25 aprel tarixlərində medal üçün mübarizə aparacaq. Həmçinin, azərbaycanlı hakim Səbinə Rzayeva texniki nəzarət qrupunda yer alacaq.
Onu da bildirək ki, bu, baş məşqçi Sərdar Həsənovun təyinatından sonra ilk yarışı olacaq. Ona böyük məşqçi Asif Məmmədov və məşqçi Əfqan Bayramov köməklik edəcək. Federasiya rəhbərliyindən vitse-prezident Firdovsi Umudov da komanda ilə birgə olacaq.
Səbuhi Musa