Gürcüstanın paytaxtı Tbilisidə keçirilən cüdo üzrə Avropa çempionatını Azərbaycan 4 medalla başa vurub.
Prosport.Az-ın Gürcüstana ezam olunmuş əməkdaşının verdiyi xəbərə görə, olimpiya, dünya və Avropa çempionumuz Zelim Kotsoyev yarımfinalda son Avropa çempionatının bürünc medalçısı niderlandlı Simyon Katarina ilə görüşdə qadağan edilmiş hansoku-make aldığı üçün İlya Sulamanidze ilə 3-cü yer uğrunda görüşə buraxılmayıb.
Beləliklə, Azərbaycan yarışı 1 gümüş və 3 bürünc medalla başa vurub. Hidayət Heydərov (73 kq) gümüş medalla kifayətlənibsə, Əhməd Yusifov (60 kq), Turan Bayramov (66 kq) və Zelim Tçkayev (81 kq) bürünc medal qazanıb.
Xatırladaq ki, ötən il Monteneqronun paytaxtı Podqoritsada keçirilmiş Avropa çempionatında Azərbaycan 1 gümüş və 4 bürünc medal əldə etmişdi.
13:40
Gürcüstanın paytaxtı Tbilisidə keçirilən cüdo üzrə Avropa çempionatının son günündə Zelim Kotsoyev bürünc medal uğrunda güləşəcək.
Prosport.Az-ın Gürcüstana ezam olunmuş əməkdaşının verdiyi xəbərə görə, o, yarımfinalda son Avropa çempionatının bürünc medalçısı niderlandlı Simyon Katarinaya uduzub.
O, bürünc medal üçün gürcü İlya Sulamanidze ilə qarşılaşacaq.
12:50
Gürcüstanın paytaxtı Tbilisidə keçirilən cüdo üzrə Avropa çempionatının son günündə Zelim Kotsoyev yarımfinala adlayıb.
Prosport.Az-ın Gürcüstana ezam olunmuş əməkdaşının verdiyi xəbərə görə, o, 1/8 finalda ukraynalı Yaroslav Davidçukdan, 1/4 finalda macarıstanlı Jombor Veqdən üstün olub.
İdmançımızın yarımfinaldakı rəqibi son Avropa mükafatçısı Simyon Katarina (Niderland) ilə qarşılaşacaq.
10:45
Gürcüstanın paytaxtı Tbilisidə keçirilən cüdo üzrə Avropa çempionatının son günündə bu gün 3 cüdoçumuz mübarizəyə qatılıb.
Prosport.Az-ın Gürcüstana ezam olunmuş əməkdaşının verdiyi xəbərə görə, bu gün olimpiya, dünya və Avropa çempionu Zelim Kotsoyev yarışa uğurlu start verib.
100 kq çəki dərəcəsində yarışan osetin legionerimiz 1/16 finalda şimali makedoniyalı Nikola Pavlovskiyə qalib gəlib. O, 1/8 finalda ukraynalı Yaroslav Davidçukla qarşılaşacaq.
+100 kq çəki dərəcəsində son Azərbaycan çempionu olmuş Kənan Nəsibovun Avropa çempionatında debütü isə uğursuz alınıb. O, son Avropa çempionatının mükafatçısı rus əsilli Erik Abramova (Almaniya) uduzaraq mübarizəni erkən dayandırıb.
+78 kq-da çıxış edən osetin legionerimiz Mədinə Kaisinova da debüt edib. O da son Avropa çempionatının mükafatçısı Elis Startsevaya (Rusiya) uduzaraq medalsız qalıb.